Depýtattar fermerlerdiń «jasyl dáliz» arqyly kedergisiz ótýin pysyqtaýdy surady
NUR-SULTAN. QazAqparat – Parlament Májilisiniń jalpy otyrysynda tótenshe jaǵdaı kezinde fermerlerge kómektesý máselesi kóterildi. Osy oraıda Úkimet basshysy Asqar Mamınniń atyna tıisti depýtattyq saýal joldandy, dep habarlaıdy QazAqparat tilshisi.
«Aýyl turǵyndaryn tolǵandyratyn asa ózekti máselelerdiń biri – kóktemgi dala jumystaryn qarjylandyrý. AÓK sýbektilerin nesıelendirý «QazAgro» UBH-nyń «Agrarlyq nesıe korporatsııasy» AQ jáne «Aýyl sharýashylyǵyn qarjylaı qoldaý qory» AQ arqyly, sondaı-aq ekinshi deńgeıdegi bankterdi jáne kredıttik seriktestikterdi qorlandyrý arqyly júrgiziledi. Shamamen, 170 mlrd teńge bólingenine qaramastan, bul qarajat tolyq kólemde ıgerilmeýde jáne sońǵy qaryz alýshylarǵa, birinshi kezekte Aýyl sharýashylyǵy taýar óndirýshilerdiń (AShTÓ) kepildikteriniń bolmaýy nemese azdyǵy sebebinen jetpeı jatyr», - dep toqtaldy depýtat Berik Ospanov.
Onyń sózinshe, qarjylandyrý problemasyn sheshý joldarynyń biri – ónimdi forvardtyq satyp alýdy qoldaný bolýy múmkin. Osy oraıda depýtat bul baǵytta Memleket basshysy bergen tapsyrmany eske saldy.
«Ókinishke qaraı, atalǵan qoldaý tetigi keshiktirilýde, al AShTÓ qarjylandyrý qıyndyqtaryn bastan keshirýde. Ótken jyldarda, astyqty forvardtyq satyp alýdy qoldaný kezinde «Azyq–túlik kelisimshart korporatsııasy» Ulttyq kompanııasy» AQ AShTÓ-ge kepilger retinde óńirlik Áleýmettik–kásipkerlik korporatsııalardyń múmkindikterin paıdalandy. Mundaı shemada ákimdikter jergilikti taýar óndirýshilermen barlyq uıymdastyrý máselelerin naqty jáne ýaqtyly pysyqtap otyrdy, qarajatty qaıtarý kezinde problemalar bolǵan joq. Osyǵan baılanysty forvardty satyp alýdy júrgizý úshin óńirlik ÁKK múmkindikterin paıdalanýdy qarastyrýdy usynamyz. Birinshiden, ÁKK ákimdikterdiń qarjy ınstıtýty retinde qaryz alýshy týraly tolyq aqparattary bar. Ekinshiden, satyp alynatyn ónim eń aldymen jergilikti halyqtyń qajettiligi úshin kerek. Bul tetik turaqtandyrý qorlaryn tolyqtyrýǵa jáne ónimderdi deldalsyz satý máselelerin retteýge múmkindik beredi. Sondaı-aq jarma, dándi, maıly daqyldar, kartop jáne kókónis sııaqty birneshe baǵyttar boıynsha ónimder satyp alýdy usynamyz», - dedi Ospanov.
Onyń paıymynsha, ÁKK-ni «QazAgro» AQ arqyly nemese respýblıkalyq bıýdjetten bólingen bıýdjettik kredıtterdiń bir bóligin jergilikti bıýdjetke qaıta bólý jolymen de qarjylandyrýǵa bolady.
«Qurmetti Asqar Uzaqbaıuly, qorytyndylaı kele, Sizden kóktemgi jala jumystary kezinde fermerler men AShTÓ-niń «jasyl dáliz» arqyly kedergisiz ótý máselesine taǵyda nazar aýdarýyńyzdy suraımyz! Qazirgi ýaqytta ár kún jáne ár saǵat óte mańyzdy, óıtkeni jer jumystary kúttirmeıdi! Búgingi tańda óńirlerdegi shtabtar bul máseleni óz qalaýy boıynsha rettep otyr, biryńǵaı algorıtm jáne naqty erejeler bekitilmegen», - dedi B. Ospanov.
