Depýtattar esirtkimen kúreske baǵyttalǵan jumystyń bel ortasynda júrýge tıis – Erlan Qoshanov
ASTANA. KAZINFORM – Depýtattar esirtki saýdasy problemasyn sheshýge baǵyttalǵan jumystyń bel ortasynda júrýge tıis. Bul týraly Májilistiń jalpy otyrysynda palataa spıkeri Erlan Qoshanov aıtty.
«Bárińiz bilesizder, jýyrda ǵana Ulttyq quryltaıdyń kezekti otyrysy ótti. Onda Memleket basshysy elimizdiń rýhanı ıdeologııalyq, halyqtyń turmysyn jaqsartýǵa baǵyttalǵan áleýmettik-ekonomıkalyq baǵdarlaryn aıqyndap berdi. Prezıdenttiń kótergen keleli máseleleri men sóılegen sózin baǵdarlamalyq qujat retinde qabyldaýǵa bolady. Qasym-Jomart Kemeluly ózekti problemalarǵa toqtalyp, olardy sheshýdiń strategııalyq jáne shuǵyl tásilderin atap kórsetti. Sonyń ishinde depýtattarǵa birqatar mindet júktedi. Biz endi solardy oryndaýǵa jedel kirisýimiz kerek», - dedi palata spıkeri.
Onyń atap ótýinshe, búgingi depýtattyq saýaldar – Memleket basshysynyń Ulttyq quryltaıda sóılegen sózine kórsetilgen naǵyz qýatty qoldaý.
«Atalǵan máseleler Parlamenttiń resmı minberinen kóterilip, naqty iske asyrylatyn bolady. ıAǵnı olardyń negizinde Parlament birqatar zań jobasyn qabyldaýǵa tıis. Máselen, búgin biz lýdomanııamen kúresýge baǵyttalǵan zań jobasyn jumysqa aldyq. Bul qujat depýtattardyń bastamashylyǵymen ázirlendi. Ony osy sessııanyń sońyna deıin qabyldaýymyz qajet. Bul – Prezıdenttiń tikeleı tapsyrmasy», - dedi Erlan Qoshanov.
Májilis tóraǵasy sońǵy kezderi esirtki saýdasy ózekti áleýmettik problemaǵa aınalyp otyrǵandyǵyn basa aıtty.
«Depýtattar osy máseleni sheshýge baǵyttalǵan jumystyń bel ortasynda júrýge tıis. Esirtki óndirisimen aınalysqany úshin jaýapkershilikti kúsheıtip, ony asa aýyr qylmystarmen teńestirýimiz qajet. Taǵy bir mańyzdy jaıt – vandalızm. Onyń da kez kelgen túri úshin jaýaptylyqty zańnama deńgeıinde qataıtý kerek. Din máselesi de asa ózekti. Osy salany retteýdiń quqyqtyq negizin dástúrli ádet-ǵurpymyz ben qundylyqtarymyzǵa, zaıyrly memleket qaǵıdattaryna súıene otyryp, qaıta qaraýymyz qajet», - dedi ol.
