Depýtattar erler men áıelderdiń teń quqyqtylyǵyna qatysty zańnamadaǵy olqylyqtardy joımaq

NUR-SULTAN. QazAqparat - QR Parlamenti Májilisiniń Áleýmettik-mádenı damý komıteti otbasylyq saıasat salasyna erler men áıelderdiń teń quqyqtylyǵyna qatysty zańnamadaǵy olqylyqtardy joıýǵa baǵyttalǵan zań jobasyn jumysqa aldy, dep habarlaıdy QazAqparat tilshisi.

«Otbasylyq jáne genderlik saıasat máseleleri boıynsha QR-nyń keıbir zańnamalyq aktilerine ózgerister men tolyqtyrýlar engizý týraly zań jobasyna Parlamenttiń bir top depýtaty bastamashylyq jasady. Zań jobasy otbasylyq saıasat salasyna erler men áıelderdiń teń quqyqtylyǵyna qatysty zańnamadaǵy olqylyqtardy joıýǵa baǵyttalǵan», - dedi Májilistiń jalpy otyrysynda atalǵan komıtetiniń tóraǵasy Beıbit Mamyraev.

Depýtattyń atap ótýinshe, birqatar zańnamalyq aktige ózgerister men tolyqtyrýlar engizý qarastyrylyp otyr. Erler men áıelderdiń teń quqyqtarynyń jáne teń múmkindikteriniń memlekettik kepildikteri týraly zańǵa teń saraptama, jynysy boıynsha statıstıka uǵymdaryn engizý, sondaı-aq erler men áıelderdiń kvazımemlekettik sektorda basshylyq jasaýy men basqarýǵa qatysýyna teń múmkindik berilýin retteý jáne basqa da túzetýler qarastyrylady.

«Komıtet osy zań jobasyn jumysqa qabyldap, ol boıynsha 2020 jylǵy 23 jeltoqsanǵa deıingi merzimge qorytyndy ázirleýge daıyn», - dedi Beıbit Mamyraev.

Osydan keıin Májilis depýtattary qaýly jobasyn biraýyzdan qoldap daýys berdi.