Depýtattar elimizde Sý resýrstaryn qorǵaý jáne paıdalaný jónindegi agenttik qurýdy usynady
annyń 28-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda birqatar depýtattar elimizde Sý resýrstaryn qorǵaý jáne paıdalaný jónindegi agenttik qurýdy usynyp, Úkimet basshysynyń atyna saýal joldady.
Bul saýaldy depýtat Rozaqul Halmuradov oqyp berdi, dep habarlaıdy QazAqparat.
«Sý resýrstarynyń tapshylyǵy ósip otyrǵan jáne álemdegi klımattyń jappaı ózgerýi jaǵdaıynda eldi sýmen qamtamasyz etýdi arttyrý sý resýrstaryn retteý jáne basqarý strategııasynyń durys tańdalýyna tikeleı baılanysty. Óıtkeni, qazirgi kúni Ortalyq Azııada, Qazaqstanda sýdy paıdalaný máselesi asa kúrdeli sıpatta tur. Máselen, sońǵy elý jylda eldi mekenderdi sý resýrstarymen qamtamasyz etý 3,5 esege azaıyp ketken. Osylaı kete berse, Qazaqstan biraz jyldan soń sý resýrstary tapshy elderdiń qataryna kirip qalýy múmkin», dedi R. Halmuradov.
Depýtattyń aıtýynsha, elimizde sý resýrstaryn basqarý jáne retteý sharalary halyqaralyq uıymdar talaptaryna saı belgilenbegen. Al Qazaqstanmen shekaralas memleketter sý máselesiniń basymdylyǵyn túsinip, jeke sý mınıstrlikterin qurǵan. «Atap aıtqanda, Qytaıda, Túrikmenstan men Tájikstanda arnaıy Sý sharýashylyǵy mınıstrligi bar. Qyrǵyz ben Ózbekstanda Aýyl jáne sý sharýashylyǵy mınıstrligi jumys isteıdi. Al keıbir jaǵdaıda, osy sý máselesine baılanysty transshekaralyq ózender problemasyn talqylaǵanda, atalǵan elderdiń mınıstrleri Qazaqstannyń Sý komıtetimen «ózderiniń inisimen» sóıleskendeı sóılesedi. Sondyqtan da Qazaqstanda Sý resýrstaryn qorǵaý jáne paıdalaný jónindegi agenttik qurýdy usynamyz», dedi R. Halmuradov. Bul máseleni birqatar depýtattar da qoldap, qol qoıǵan.
