Depýtattar elektrondy kúndeliktiń bilim júıesine qalaı engizilgenin tekserýdi talap etti
ASTANA. QazAqparat - Parlament Májilisiniń depýtattary kundelik.kz baǵdarlamasynyń qaıdan kelgenin, Qazaqstandaǵy bilim júıesine qalaısha engizilgenin tekserýdi talap etti, dep habarlaıdy «QazAqparat» HAA tilshisi.
«Memlekettik organdardyń memlekettik satyp alý kezinde otandyq bıznestiń shetke ysyrylyp jatqany týraly shaǵymdar kelip túsip jatyr. Sonyń biri - kópke buryn belgili bolmaǵan kundelik.kz baǵdarlamalyq ónimi. Onyń mazmuny men kimge qajetti ekenine tıispeı turyp, ol baǵdarlamany jasaýshylarǵa mán bermeı qoıýǵa bolmaıdy. BAQ-qa sensek, 2016 jyldyń naýryzynda ázirlengen baǵdarlamanyń quryltaıshysy «Kundelik» JShS - qazaqstandyq zańdy jáne jeke tulǵalarmen birge RF-nyń «Dnevnık.rý» jaýapkershiligi shekteýli qoǵamy bolyp tabylady. Buǵan qosa qazaqstandyq kompanııanyń 45 paıyzdyq úlesi - «Dnevnık.rý» JShO-ǵa tıesili. Dál reseılik platformanyń bazasynda qazaqstandyq elektrondyq kúndelik jumys istep tur», - dedi búgingi Májilis otyrysynda depýtat Keńes Absattırov BǴM basshysyna saýal joldaı otyryp.
Onyń aıtýynsha, «Aq jol» fraktsııasy 2017 jyldyń qyrkúıek aıynda qazirgi bilim júıesiniń jaǵdaıynda basqa elge ketip jatqan jastardyń máselesin kótergen.
«Al endi kelip uzaq ýaqyt boıy qazaqstandyq oqýshylardyń oqý úlgerimin qamtamasyz etýde sheteldik kompanııany jumyldyrý - úzdik oqıtyn balalardyń eshqandaı UBT-syz kórshiles elderdiń JOO-laryna túsýine jaıly jaǵdaı jasary anyq. Osyǵan baılanysty birneshe suraq týyndaıdy? Nelikten BǴM belsendi túrde nasıhattaıtyn Biryńǵaı elektrondyq kúndelik - reseılik platformada jasalady. Al bizde 2010 jyldan bastap el ishindegi mektepterde sapasy odan kem túspeıtin «Innovatsııalyq tehnologııalardyń ortalyǵy» JShS əzirlegen baǵdarlamalyq ónimder bar. Nelikten shetelde úlesi bar kompanııaǵa oqýshylar men ata-analardyń personaldyq məlimetteri beriledi? Nege shetelge qatysy bar jeke kompanııa aqparattyq júıelerdiń biryńǵaı memlekettik operatorǵa tıesili BǴM servısin qoldanady. MJƏ jobasyn júzege asyrýǵa jaýapty atqarýshymen nelikten qazaqstandyq merdigerdiń ótinimi shetke ysyryldy?», - dedi ol.
Halyq qalaýlysy osyǵan baılanysty myna saýalǵa jaýap berýdi surady.
«Joǵaryda atalǵan joba boıynsha memlekettik-jekeshelik əriptestik boıynsha kelisim jasaldy ma? Jasalsa kimmen? Ekinshiden, 2017 jyldyń 4 naýryzynda ótken «Atameken» UKP otyrysyndaǵy qaıta konkýrs ótkizýdi uıymdastyrý nelikten ótkizilmegen?», - dep túıdi depýtat.
