Depýtattar elektr energııasynyń birden qymbattaýyna alańdaýshylyq bildirdi
Parlament Májilisi Shakır Hahazov depýtattyq saýalynda Májiliste «QR-daǵy elektr energııasy máseleleri boıynsha keıbir zańnama aktilerine ózgerister men tolyqtyrýlar engizý týraly» zań jobasy qaralǵan kezdi eske aldy. Onyń aıtýynsha, dál sol tusta Energetıka mınıstrligi elektr energııasy tarıfin tómendetý men energııa taratýshy kásiporyndardy qoldaý baǵytynda zańnama normalaryna sáıkes barlyq sharalar qolǵa alynatynyn aıtyp, depýtattardy kóndirgen. Atalǵan zań jobasynyń alǵashqy mindeti - aımaqtyq elektrjelili kompanııalardy irilendirý arqyly elektrmen qamtýdyń senimdiligin arttyryp, elektr energııasynyń baǵasyn tómendetý bolǵan.
«Alaıda iske kelgende bári kerisinshe bolyp shyqty: 2017 jyldyń 1 tamyzynda Energetıka mınıstrligi saralanǵan tarıfti alyp tastap, bul jaǵdaı elektr energııasynyń birden qymbattaýyna alyp keldi. Halyqqa, ShOB-qa burynǵydan kóp aqsha tóleýge týra keldi. Quzyrly vedomstvo zańnyń normalary men talaptaryna qaramastan, tarıfterdiń ósimine jol berip, elektr jelilerin kúsheıtý boıynsha jumys nátıjesin halyqqa tanystyrǵan joq», - deıdi Sh.Hahazov.
Depýtat, sonymen birge, Energetıka mınıstrliginiń 2019 jyly tarıf arzandaıdy degen aqparatyna kúmán keltirdi. Sh.Hahazovtyń aıtýyna qaraǵanda, Energetıka mınıstrligi halyq pen depýtattarǵa bergen ýádesin oryndamaq túgili, 2018 jyldyń 1 qańtarynan bastap búkil respýblıka boıynsha elektr energııasyn taǵy 10 paıyzǵa qymbattatyp jibergen. Hahazov mundaı qadam bıznes ókilderi men qarapaıym azamattardyń alańdaýshylyǵyn týǵyzatynyn atap ótti.
Osyǵan baılanysty QHA depýtattary Premer-Mınıstrge depýtattyq saýal joldap, Energetıka mınıstrligin naqty osy máselede birqatar sharalardy qolǵa alýǵa mindetteýdi surap otyr.
