Depýtattar el múddesi úshin qyzmet etýi qajet - Memleket basshysy

ASTANA. QazAqparat – Depýtattar el múddesi úshin qyzmet etýi qajet. Bul týraly Parlament palatalarynyń birlesken otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Aqparattyq tehnologııa damyǵan qazirgi zamanda halyq bárin jiti baqylap otyr. Osy rette, depýtattardyń el aldyndaǵy jaýapkershiligi artqanyn atap ótken jón. Sondyqtan, osy ǵımaratta otyrǵan depýtattar 5 jyl boıy sanaly, parasatty túrde belsendi jumys isteıdi dep senemin. Sebebi, el múddesi úshin qyzmet etý qajet. Bul – «Memlekettik bıliktiń birden-bir bastaýy – halyq» degen qaǵıdanyń taǵy bir kórinisi», - dedi Qasym-Jomart Toqaev.

Prezıdent saılaý naýqanyna óte kóp adam qatysqanyn atap ótti.

«Bul – qalypty úrdis. Olardyń arasynda maqsaty, ustanymy ártúrli jandar bar. Qazir eldiń kózi ashyq, kókiregi oıaý, saıası saýaty joǵary. Kez kelgen saılaýda jeńiske jetý úshin jyldar boıy qajyrly eńbek etý qajet. Halyqtyń jáne tarıhtyń aldyndaǵy jaýapkershilikti seziný kerek. Bir sózben aıtsaq, uzaq merzimdi, júıeli strategııanyń arqasynda ǵana jeńiske jetýge bolady. Qajetti daýys jınaı almaǵan úmitkerler úshin de bul – úlken tájirıbe jáne jańa múmkindik. Barshańyzdy Qazaqstan múddesi úshin jumylyp jumys isteýge shaqyramyn», - dedi Memleket basshysy.