Depýtattar ekonomıka salalarynyń statıstıkalyq kórsetkishterine kúmán keltiredi
ASTANA. QazAqparat - Búgin Májilistegi Statıstıka agenttiginiń byltyrǵy jylǵy qorytyndylaryna arnalǵan Úkimet saǵatynda qosymsha baıandama jasaǵan Ekonomıka jáne óńirlik damý komıtetiniń tóraǵasy Seıitsultan Áıimbetov statıstıkalyq jumystarǵa kóńil tolmaıtynyn jetkizdi.
«Agenttik jumysynyń tyń jetistikterine qaramastan, bizdiń pikirimizshe statıstıkalyq aqparattyń qurylymyn ozyq halyqaralyq standarttar deńgeıine jetkizýge oń yqpal etetin máseleler barshylyq. Aıtalyq, halyq ta, depýtattar da el ekonomıkasyn damytýdy taldaý máselesine, strategııalyq jáne baǵdarlamalyq qujattardaǵy kórsetkishterge mańyz beredi. Belgili bolǵanyndaı, búgingi tańda Qazaqstan ekonomıkasyn, bilim berýdi, densaýlyq saqtaýdy, kásipkerlikti odan ári damytýǵa, sonymen birge halyqty aýyz sýmen, turǵyn úımen qamtamasyz etýge baǵyttalǵan úsh strategııalyq qujat, úsh strategııa, eki doktrına, 25 tujyrymdama, 8 memlekettik baǵdarlama qabyldandy. Alaıda, ókinishke qaraı baǵdarlamalyq qujattardy iske asyrý boıynsha aǵymdaǵy statıstıkalyq kórsekishterdi tabý tym qıyn nemese olar múldem joq», - dedi komıtet tóraǵasy Seıitsultan Áıimbetov.
Onyń aıtýynsha, agenttikpen Údemeli ındýstrııalyq-ınnovatsııalyq damý baǵdarlamasyndaǵy kórsetkishter ındıkatorlaryna tek monıtorıng qana júrgiziledi. Sonymen qosa, ındýstrııalyq damý baǵdarlamasyna monıtorıng kórsetkishteri tek memlekettik organdarymen ǵana kelisilip, bıznes qaýymdastyqtyń múddeleri eskerilmeı keledi. «Buǵan qosa ekonomıkalyq salalar boıynsha basqa da statıstıkalyq kórsetkishterdiń anyqtyǵy kúmán keltiredi. Agenttik pen mınıstrlikterdiń statıstıkalyq kórsetkishteri nelikten árkelki ekenin túsine almadyq», - dedi S. Áıimbetov.
