Depýtattar «e-learning» baǵdarlamasyn jaýyp tastaýdy usyndy
ASTANA. QazAqparat - Búgin Májiliste «2015-2017 jyldarǵa arnalǵan respýblıkalyq bıýdjet týraly» zań jobasynyń tanystyrylymy barysynda depýtattar elektrondy oqytý máselesine arnalǵan «e-learning» baǵdarlamasyn synǵa aldy. Qyrýar qarajat jumsalǵanymen, tıimdilik tanyta almaı otyrǵan baǵdarlamany jaýyp tastaý týraly máseleler de kóterildi.
Depýtat Gúlmıra Isimbaevanyń aıtýynsha, elektrondy oqytý baǵdarlamasy 2011 jyldan bastap engizile bastaǵan. Osy jobaǵa 2011-2014 jyldar aralyǵynda 27,5 mlrd teńge jumsalypty. «Al endi 2015-2017 jyldar aralyǵynda taǵy 16 mlrd teńge bólý kózdelip otyr. Sonymen qatar, salynyp jatqan nysandar 2012 jyly 1 159 edi, 2017 jyly da sol qalpynda qalatyn sııaqty. 27,5 mlrd teńge bólinip otyrsa da, tıimdiligi joq bul qandaı baǵdarlama? Baǵdarlamanyń tıimdiligin, qansha nysan salynyp, qansha mektep pen kolledjge engzilip jatqanyn teksergender bar ma?», - dedi depýtat G. Isimbaeva.
Al Májilistiń Qarjy jáne bıýdjet komıtetiniń tóraıymy Gúljan Qaraǵusova e-learning baǵdarlamasyn múldem jaýyp tastaýdy talap etti. «Osy baǵdarlama boıynsha byltyr bizge esep beremiz dep ýáde bergender eshteńe kórsete almady. Meniń usynysym mynadaı, olar bizge eshteńe túsindirmeıdi eken, tıimdiligi tipti joq eken, endeshe bul baǵdarlamany jaýyp tastaý qajet», - dedi G. Qaraǵusova.
