Depýtattar dıqandarǵa beriletin dızel baǵasyn taǵy tómendetýdi usyndy
ASTANA. QazAqparat - Depýtattar kóktemgi egis jumystary úshin dıqanshylarǵa arnalǵan dızel otynynyń baǵasyn taǵy 25-30 paıyzǵa tómendetýdi usyndy. Bul týraly Májilistegi «Nur Otan» partııasy fraktsııasynyń músheleri atynan Úkimet basshysy Baqytjan Saǵyntaevqa joldanǵan depýtattyq saýalda aıtylǵan, dep habarlaıdy QazAqparat.
«Bizdiń depýtattyq saýalymyz aýyl sharýashylyǵy taýarlaryn óndirýshilerdiń kóktemgi egistik jumystary qarsańynda janar-jaǵarmaı materıaldary, atap aıtqanda dızel otyny baǵasynyń jyl saıyn ósýine qatysty bolyp otyr. Máselen, 2015 jyldan beri baǵa 1,9 ese ósken. Mysaly mundaı jaǵdaı Aqmola, Shyǵys Qazaqstan, Qostanaı jáne Qaraǵandy oblystarynda ósimdik sharýashylyǵy men mal sharýashylyǵy ónimderiniń edáýir qymbattaýyna soqtyryp, osy óńirlerdegi kóptegen aýyl sharýashylyǵy ónimderin óndirýshilerdiń qarjylyq jaǵdaıyn qıyndata tústi», - dedi Májilistiń jalpy otyrysynda áriptesteriniń atynan depýtattyq saýaldy oqyǵan Jeksenbaı Dúısebaev.
Depýtattardyń paıymynsha, buǵan aýyl sharýashylyǵy ónimderine janar-jaǵarmaı materıaldarynyń jumsalatyn shyǵyndarynyń úlesi 25 paıyzǵa deıin jetýi sebep bolýda.
"Mundaı jaǵdaı elimizdiń basqa óńirlerinde de oryn alyp otyr. Atap aıtqanda, qalyptasqan jaǵdaı is júzinde aýyl sharýashylyǵy ónimderiniń básekege qabilettiligin tómendetýde. Degenmen aǵymdaǵy jyly Úkimet kóktemgi egis jumystaryn júrgizý úshin dızel otynynyń baǵasyn óndiriletin zaýyttan alǵanda 1 lıtrine 130 teńge belgilegen. Al óńirlerge jetkizilýin eskersek, bul baǵa ortasha eseppen 150 teńgege deıin kóteriledi", -dedi Jeksenbaı Dúısebaev.
Onyń aıtýynsha, aýyl sharýashylyǵy taýaryn óndirýshilerge agrotehnıkalyq is-sharalardy ýaqytyly júrgizý, tutastaı alǵanda aýyl sharýashylyǵy óniminiń ishki jáne syrtqy naryqtardaǵy básekege qabilettiligin arttyrý úshin bul baǵa tıimsiz.
"Osyǵan baılanysty belgilengen dızel otynynyń baǵasyn qaıta qarap jáne ony 25-30 paıyzǵa deıin tómendetý týraly máseleni qarastyrýyńyzdy suraımyz», - dedi ol.
