Depýtattar BQO-daǵy eki aýdanǵa «Áskerı dańq aýdandary» mártebesin berýdi surady
NUR-SULTAN. QazAqparat – «Nur Otan» partııasynyń bir top depýtaty Stalıngrad shaıqasynda jeńiske jetýge erekshe úlken qosqan eki aýdanǵa «Áskerı dańq aýdandary» mártebesin berýdi surap, Úkimetke saýal joldady, dep habarlaıdy QazAqparat tilshisi.
«Úkimet basshysynyń orynbasary Eraly Toǵjanovqa depýtattyq saýal joldaýymyzǵa BQO-nyń Bókeı orda men Jánibek aýdandarynyń ardagerler uıymynyń ótinishi sebep boldy. Bıyl Jeńiske 75 jyl toldy. Atalǵan aýdandardyń turǵyndarynyń júregine soǵys jara qaldyrǵan. Stalıngrad soǵysy úshin maıdannyń janyndaǵy shepte turǵan olar talaı ret bombanyń astynda qalǵan», - deıdi Shavhat Ótemisov Úkimet basshysyna joldaǵan saýalynda.
Onyń aıtýynsha, SSSR Qorǵanys Halyq Komıssary I.Stalınniń 1941 jylǵy 26 qarashadaǵy №0444 buıryǵyna sáıkes, Batys Qazaqstan oblysynyń Jánibek, Orda, Qaztalov, Fýrmanov aýdandarynyń aýmaqtary Stalıngrad áskerı okrýginiń quramyna engen.
«Edildiń jaǵalaýyna jaqyn ornalasýy - Jánibek pen Orda aýdanynyń aýyldaryn da áskerı áreketter qaıshylasqan aýmaqtarǵa aınaldyryp jiberdi. Tarıh ǵylymdarynyń kandıdaty P.R.Býkatkınniń málimetteri boıynsha fashıstik avıatsııanyń bombalaýynyń aýqymy mynadaı: 1942 jyldyń qazan jáne qarasha aılarynda ǵana fashıstik nemis avıatsııasy Saıhın jáne Shýngaı stantsııalarynyń tóbesinde 22 toptyq jáne 12 ret jalǵyz ushyp, oǵan jaýdyń 138 avıatsııasy qatysqan. Mundaı ushý jaǵdaılary únemi ótkizilip turatyn. Jergilikti turǵyndarmen qatar Stalıngradtan evakýatsııalanǵan adamdardy qosqanda myńdaǵan adam qaza tapty. Buǵan aýyldaǵy Jánibek jáne Saıhın aýyldaryndaǵy beıitter men qaza tapqandardyń eskertkishteri dálel», - deıdi ol.
Depýtat sol kezde jergilikti halyq qatty qınalǵanyn, sonymen birge olar bombalaýdan qorǵanatyn oryndardy salýǵa belsene atsalysyp, jaýmen bir kisideı kúreskenin aıtady.
«Osy jaılardy ataı kele Stalıngrad shaıqasyndaǵy jeńiske BQO-nyń Jánibek pen Bókeı Ordasy aýdanynyń qosqan úlesin zertteý boıynsha arnaıy komıssııa qurýdy suraımyz. Sonymen birge Úkimet sheshimimen osy aýdandarǵa «Áskerı dańq aýdandary» mártebesin berý máselesin qarastyrýdy ótinemiz», - dedi ol.
