Depýtattar bıyl «Arqalyq - Derjavınsk» jolyn jóndeýge aqsha bólýdi surady

ASTANA. QazAqparat - «Nur Otan» partııasynyń fraktsııasy men QHA atynan saılanǵan Májilis depýtattary 2018 jyly Arqalyq - Derjavınsk baǵytyndaǵy respýblıkalyq mańyzy bar joldy jóndeýge aqsha bólýdi surady. Olardyń aıtýynsha, atalmysh aralyqtaǵy joldyń jóndelmeýi Arqalyqtaǵy halyqqa asa jaısyz tıip tur, dep habarlaıdy «QazAqparat» HAA tilshisi.

Parlament Májilisiniń otyrysynda májilismen Shaımardan Nurymov bir top depýtattyń atynan QR Premer-Mınıstriniń birinshi orynbasary Asqar Mámınge depýtattyq saýal joldady.

«Parlament Májilisi depýtattarynyń Arqalyqtaǵy saılaýshylarmen, bıznesmendermen kezdesýi barysynda «Arqalyq - Derjavınsk» baǵytyndaǵy respýblıkalyq mańyzy bar joldyń kúrdeli jaǵdaıy birneshe márte kóterildi. Ol jol jyldar boıy jóndelmegen. Osynyń saldarynan bul jolmen júrý jolaýshylardyń qaýipsizdigin qamtamasyz ete almaı tur. Sonymen birge, kólikter atalǵan aralyqta kóp buzylyp jatyr. Kóliktik kompanııalar osy aralyqta júk tasymalyn júzege asyrý ótiniminen bas tartady. ıAǵnı, Arqalyqqa júk alyp kirgisi kelmeıdi. Bul jaǵdaı Torǵaı aımaǵynyń bıznesin kóliktik blokadada qaldyrýy múmkin», - deıdi májilismen.

Onyń aıtýynsha, Investıtsııalar jáne damý mınıstrligine, «QazAvtojolǵa» Qostanaı oblysynyń shekarasynan Derjavınskke deıingi jolǵa kúrdeli jóndeý júrgizý týraly ótinish birneshe ret jaýapsyz qalǵan. Anda-sanda júrgiziletin shuńqyrlardy jamaý jumystary sapasyz júrgizilgen.

«Respýblıkalyq jáne oblystyq joldardy jóndeý baǵytynda Qostanaı oblysynda jol qabatyn qalpyna keltirý boıynsha ortasha jóndeý jumystaryn «salqyn resaıklıng» ádisimen júrgizý tájirıbesi qalyptasqan. 1 shaqyrym jolǵa kúrdeli jóndeý júrgizýdiń ortasha baǵasy 149 mıllıon teńge tursa, «salqyn resaıklıng» ádisimen 1 shaqyrym jolǵa ortasha jóndeý júrgizý quny 29,6 mıllıon teńge turady. Bul kúrdeli jóndeý jumystarynan 6 esege arzan», - deıdi ol.

Sondyqtan Shaımardan Nurymov óz sózinde «salqyn resaıklıng» ádisi jol qabatynyń sapasyn qamtamasyz etetinin tilge tıek etti.

«Osyǵan baılanysty 2018-2019 jylǵa arnalǵan bıýdjetten Arqalyq - Derjavınsk jolyna ortasha jóndeý jumystaryn júrgizý úshin 2018 jyly aqsha bólýdi suraımyz», - dep túıdi májilismen.