Depýtattar benzınniń qymbattaýyna qatysty tekserý júrgizýdi surady
NUR-SULTAN. QazAqparat – Parlament Májilisiniń jalpy otyrysynda depýtat Albert Raý benzınniń qymbattaýyna qatysty tekserý júrgizýdi surady, dep habarlaıdy QazAqparat tilshisi.
«Bizdiń depýtattyq saýal sońǵy ýaqytta janar-jaǵarmaı naryǵynda benzın baǵasynyń ósimine baılanysty bolyp otyr. Jyl basynan beri AI-92 markaly benzıniniń quny Almatyda lıtrine 150 teńgeden 168 teńgege deıin joǵarylady, al Nur-Sultanda - 170 teńgege deıin, Aqtaýda – 172 teńgege deıin, Atyraýda 200 teńgege deıin jetti. Eger buǵan deıin quzyrly vedomstvo mundaı baǵa qubylmalyǵyn ımportqa táýeldilik, munaı óńdeý zaýytyndaǵy josparly jóndeýmen túsindirse, endi osy joly sebepti Atyraý munaı óńdeý zaýytyndaǵy tehnologııalyq qondyrǵylardyń apattyq toqtaýymen baılanystyryp otyr. Óndiristik kemshilikterge «obektıvti sebepterdi» tabýǵa bolatyny belgili. Degenmen, budan avtokólik júrgizýshileri zardap shekpeýi tıis dep sanaımyz», - dedi A. Raý Úkimet basshysynyń orynbasary Roman Sklıardyń atyna joldaǵan saýalynda.
Osy oraıda ol benzın baǵasynyń ósýi tarıfterdiń, taýarlar men qyzmetterdiń sońǵy qunyna yqpal etetinin eske saldy. Munyń saldarynan qarapaıym tutynýshylar zardap shegedi.
«Benzın baǵasynyń ósimine qatysty jańalyqtar taraǵannan keıin, Energetıka mınıstrligi taratqan aqparatta janar-jaǵarmaı baǵasyna vedomstvo jaýapty emestigi atalyp ótken. Habarlamada qazirgi kezde munaı ónimderiniń ishki naryǵyndaǵy baǵa rettelmeıtindigi jáne naryqpen suranys ári usynys negizinde aıqyndalatyny jarııalanǵan. Tutynýshy úshin sońǵy baǵa munaı óniminiń kóterme qunynyń, janar-jaǵarmaı quıý stantsııasyna deıingi barlyq kólik shyǵyny, munaı bazasynda saqtaý, bólshek satýshynyń shyǵyny, sondaı-aq aktsızder men salyq negizinde qalyptasatyndyǵy jazylǵan. Quzyrly vedomstvonyń osyndaı oǵash ustanymy olarda benzın baǵasynyń ósimine áreket etýde túsinikti strategııa men tıisti is-sharalardyń joqtyǵyn baıqatyp otyr», - dedi A. Raý.
Bul turǵyda depýtat Úkimetke tıisti usynystardy jarııalady:
1) janar-jaǵarmaı naryǵynda jaǵdaıdy turaqtandyrý boıynsha qajetti sharalardy qabyldaý:
2) benzın baǵasyn retteýdiń tıimdi tetikterin daıarlap, engizý;
3) Básekelestikti qorǵaý jáne damytý agenttigimen birlese janar-jaǵarmaı naryǵynda baǵa boıynsha kelisý men karteldik kelisim yqtımaldyǵyna tekserý júrgizý.
