Depýtattar baspa isi men kınoóndirisin damytýdyń joldaryn atady
ASTANA. QazAqparat - Kitap shyǵaratyn, fılm túsiretin kompanııalarǵa arnaıy ekonomıkalyq aımaq rejıminde jumys isteýge múmkindik berý qajet. Mundaı usynysty búgin Senattyń jalpy otyrysynan keıin QR Premer-Mınıstri Baqytjan Saǵyntaevtyń atyna depýtattyq saýal joldaǵan senator Birǵanym Áıtimova jasady, dep habarlaıdy QazAqparat tilshisi.
«Baspa óneri rýhanı qundylyqtardy jaryqqa shyǵarý arqyly materıaldyq ıgilikterge ıe bolýdyń bir joly bolyp tabylady. Qazaqstandaǵy kitap óndirisi men baspa isi elimiz Táýelsizdik alǵannan keıingi jyldarda túbegeıli ózgeristerge túskeni bárimizge belgili. Burynǵy bir ortalyqqa baǵynǵan memlekettik baspalar men polıgrafııalyq kásiporyndar jekeshelendirildi, básekelestik ortaǵa berildi. Sóıtip, naryqtyq ekonomıkaǵa bet burǵan tusta kitap pen baspa salasy qıyn jaǵdaılarǵa tap keldi. Kitap shyǵarý kúrt kemidi», - dedi Birǵanym Áıtimova senator Darıǵa Nazarbaevamen birge ázirlegen depýtattyq saýalyn joldaı kele.
Onyń sózine qaraǵanda, baspalar kitap naryǵyn jańa zamanǵa beıimdeýdi endi qolǵa alyp jatyr. Qazirgi kezde baspalar mátin terýden bastap, redaktsııalaý, túzeý sııaqty qyzmettermen qatar, túpteý, basyp shyǵarý, sońynda satý, taratý isterin de bir ózderi atqarady. Zamanaýı tehnologııalarmen jabdyqtalǵan baspahanalary bar. Ári jeke saıttary jáne sol arqyly onlaın tapsyrys jasaý múmkindikteri qarastyrylǵan.
«Kitap shyǵarý men taratýdy naryq qatynastaryna beıimdep jańa deńgeıge kóterý - eń aldymen osy jumyspen tikeleı aınalysatyn baspagerlerdiń mindeti ekendigi biz aıtpasaq ta túsinikti. Soǵan oraı, baspagerler qaýymy da óz jumystaryn qazirgiden nyǵaıtyp, jańa deńgeıge kóterýi óte qajet. Bolashaqta naryq zańynyń talaptary barynsha qataıady», - dedi ol.
Sonymen qatar depýtat kıno túsirý salasyna jumsalatyn ınvestıtsııalar kólemi de jyl saıyn artyp kele jatqanyna nazar aýdartady.
«Ulttyq kınematograf Eýropa, Azııa jáne Amerıkadaǵy óner ortalyqtarynan seriktesterdi kóptep taba bastady. Eýropa men Azııa arasynda jatqan Qazaqstannyń geografııalyq jaǵdaıy kınofılm túsirýde halyqaralyq yntymaqtastyqty jemisti túrde jolǵa qoıýǵa keń múmkindik beredi. Mamandardyń aıtýynsha, sońǵy úrdis bolashaqta eldegi kıno ónerkásibiniń kóptegen tabystarǵa jetýine jol ashady»,- dedi senator.
Onyń dereginshe, eldegi kıno naryǵynyń aýqymy tar bolyp jáne jergilikti kınostýdııalar túsirgen fılmderdi jurtqa kórsetýden túsetin paıda jalpy kassalyq túsimniń on paıyzyna da jetpeıdi. Al reseılik dıstrıbıýtorlar Qazaqstanǵa eksporttap otyrǵan Gollıvýd stýdııalarynyń fılmderinen túsetin paıda kassalyq túsimniń shamamen jetpis paıyzyn quraıdy.
«Osy bir ahýal Qazaqstan kıno ónerkásibi salasyndaǵy kásipkerlerdiń fılm túsirýde halyqaralyq yntymaqtastyqty damytýǵa umtylýyna túrtki bolyp otyr. Sebebi qoıylymdy el aýmaǵynda kórsetý arqyly kınofılm túsirýge ketken qarjyny keri qaıtarýǵa bolady», - dep esepteıdi B.Áıtimova.
Osyǵan baılanysty, ol memleket tarapynan kitap shyǵarýmen jáne kınoóndirisi qyzmetterine qatysy bar salalardy damytý máselelerine erekshe nazar aýdarý qajettigin atap ótti. Óıtkeni qazirgi ýaqytta bul salalar óziniń damýyn qajet etýde, úlken qarjylyq jáne shyǵarmashylyq resýrstardy talap etedi. Osy salalardy damytý arqyly, otandyq kitap jáne kıno ónimmen toltyrý múmkin bolady.
«Qazirgi ýaqytta elimizde qyzmettiń basym túrlerin júzege asyrý úshin 11 arnaıy ekonomıkalyq aımaqtar jumys isteıdi. Aımaqtarda arnaıy quqyqtyq rejım qoldanylady, shekaralary naqty belgilengen, kompanııalarǵa memleket tarapynan qurylymdalǵan yntalandyrý paketin usynady. Aımaqtar qazirgi zamanǵy ónimdiligi joǵary, básekege qabiletti óndiristerdi jedel damytý, ekonomıka salalaryna jáne óńirlerge ınvestıtsııalar, jańa tehnologııalar tartý, sondaı-aq halyqty jumyspen qamtýdy arttyrý maqsatynda qurylǵan. Aımaq qatysýshylary úshin Salyq kodeksinde jáne «Qazaqstan Respýblıkasyndaǵy arnaıy ekonomıkalyq aımaqtar týraly» Zańynda korporatıvtik tabys salyǵyna, jer salyǵyna, múlik salyǵynan bosatý, qosylǵan qun salyǵyna jeńildikter kózdelgen. Qurmetti Baqytjan Ábdiruly, joǵaryda aıtylǵandardy eskere otyryp, Sizden kitap óndirisi men baspa isi, kınoóndiris salalary boıynsha otandyq kompanııalardyń aımaq rejıminde jumys isteý múmkindigin qarastyrýdy jáne osy máseleni normatıvtik quqyqtyq retteý jóninde tıisti sharalar qabyldaýdy suraımyz»,- dedi senator.
