Depýtattar balalardy zııandy aqparattardan qorǵaý máselesin talqylady
ASTANA. 27 naýryz. QazAqparat - Májilistiń Áleýmettik-mádenı damý komıtetiniń músheleri óskeleń urpaqty adamnyń oı-sanasynyń damýyna zııan keltiretin aqparattardan qorǵaý máselesin talqyǵa saldy.
Májiliste depýtattar bastamashy bolǵan «Balalardy densaýlyǵy men damýyna zardabyn tıgizetin aqparattan qorǵaý týraly» zań jobasy boıynsha qurylǵan jumys tobynyń kezekti otyrysy bolyp ótti.
Zań jobasyn ázirlegender - Parlament Májilisiniń depýtattary Gúlnar Seıitmaǵanbetova, Aldan Smaıyl, Gúlmıra Isimbaeva, Svetlana Bychkova.
Atalǵan komıtettiń múshesi, jumys tobynyń jetekshisi Aldan Smaıyl salystyrma kestege engizilgen zań jobasyn birqatar baptar boıynsha jeke-jeke qaraýǵa shaqyrdy.
Jumys tobynyń otyrysynda Májilis depýtattary Gúlnár Yqsanova, Nadejda Nesterova, Zýhra Saıapova, Quralaı Qareken, Orazgúl Asanǵazy birneshe túzetýler boıynsha óz usynystaryn ortaǵa saldy.
Búgingi tańda salystyrma kestege salalyq komıtetter men depýtattar usynǵan 44 túzetý engizilgen.
Aldan Smaıyl óz sózinde qazir qoǵam da, adam da ózgerip jatqanyn, búgingi zamanǵa saı zańdy shyǵarý qajet ekenin aıtty. Jas urpaqty keri tárbıeleýge nemese arandatýǵa shaqyratyn aqparattan qorǵaý barshamyzdyń mindetimiz ekenin eske saldy.
Zań jobasynda kompıýterlik jáne ózge de elektrondy oıyndardy taratýshylardyń mindetteri aıqyndalǵan. Ondaı oıyndarda balalarǵa usynýǵa tyıym salynǵan aqparattyq ónimderge tán kórinisterdiń bolmaýyna mán berilip otyr.
