Depýtattar azyq-túlik qaýipsizdigi boıynsha komıssııa qurýdy usyndy

NUR-SULTAN. QazAqparat – Májilistiń jalpy otyrysynda depýtat Aıqyn Qońyrov azyq-túlik qaýipsizdigine qatysty Úkimet basshysy Asqar Mamınniń atyna saýal joldady, dep habarlaıdy QazAqparat tilshisi.

Onyń aıtýynsha, otbasylyq bıýdjetke pandemııa men karantınge baılanysty azamattardyń kirisin joǵaltýy ǵana emes, sonymen qatar azyq-túlik baǵasynyń baqylaýsyz ósýi de keri áser etedi. Bir jyl ishinde azyq-túlik baǵasy 11,4 paıyzǵa ósti.

Negizinen, halyq tutynatyn azyq-túlik, ıaǵnı jarma, un, jumyrtqa, kúnbaǵys maıy, qant sekildi ónimder qymbattady. 2020 jyldyń sońǵy málimetterine qaraǵanda, qazaqstandyq otbasylardyń bıýdjetindegi azyq-túlik shyǵyndarynyń úlesi 54,3 paıyzǵa jetti.

Depýtattyń paıymynsha, bul turǵyda júıeli sheshim usynylmaı keledi. Azyq-túlik naryǵynyń turaqty jumys isteýin birneshe vedomstvo qadaǵalaıdy. Biraq olardyń kelisilgen jalpy qyzmetinen tıisti nátıje bolmaı tur.

«Memlekettik mehanızmder taýyq jumyrtqasy nemese kúnbaǵys maıy baǵasynyń ósýine baılanysty jekelegen salalyq irkilisterdi jeńe almaıdy. Olarda azyq-túlik ınflıatsııasyn jumsartý jaǵyna ótý úshin júıeli sharalar da qamtylǵan», – dedi halyq qalaýlysy.

Osy oraıda A. Qońyrov QHP azyq-túliktiń ekonomıkalyq qoljetimdiligine basymdyq bere otyryp, azyq-túlik qaýipsizdigi strategııasyn ázirleý jáne jumystyń osy sektoryna jaýapty memlekettik organdy nemese komıssııany aıqyndaý qajet dep sanaıdy. Sondaı-aq ol turaqtandyrý qorlarynyń jumysyn obektıvti baǵalaýdy usyndy.