Depýtattar aýyldardaǵy poshta qyzmetkerleriniń jalaqysyn kóterýdi usyndy
NUR-SULTAN. QazAqparat – Májilistiń Qazaqstan halqy Assambleıasynan saılanǵan depýtattary aýyldardaǵy poshta qyzmetkerleriniń eńbekaqysyn kóterýdi surady. Osy oraıda QR Premer-Mınıstriniń birinshi orynbasary – Qarjy mınıstri Álıhan Smaıylovtyń atyna depýtattyq saýal joldandy, dep habarlaıdy QazAqparat tilshisi.
«Poshta qyzmeti elimizdegi qoǵamdyq qatynastardy iske asyrýǵa úlken úlesin qosyp keledi. Hat almasýdan bólek gazet-jýrnaldardy jergilikti turǵyndarǵa taratý búgingi poshta qyzmetiniń basty mindeti ekeni bárimizge belgili. Ásirese, aýyldyq eldi mekenderde poshta bólimderi turǵyndar úshin basty ról atqaryp otyr. El áleýmettik jáne taǵy da basqa tólemderge poshta qyzmeti arqyly qol jetkizip jatqany bul qyzmet túriniń halyq úshin mańyzy zor ekendigin kórsetedi. «Qazposhta» AQ qyzmet kórsetýdiń kóptegen túrlerin júzege asyrady. Qarjylyq operatsııalar, taýarlar tasymaly, tólemder, banktik qyzmettiń keıbir túrleri jáne taǵy basqa da qyzmet kórsetýlerdi júzege asyratyn bul uıym tabystan kende emes. Mine osylaı bola tura poshtashylardyń jalaqysy óte tómen deńgeıde qalyp qoıǵany aqylǵa syımaıdy», - dep toqtaldy depýtat Shaımardan Nýrýmov.
Onyń sózine qaraǵanda, osy jyldyń qańtar aıynda Májilis depýtattarynyń óńirlerge sapary aıasynda Almaty oblysynda elmen kezdesýde eldi mekender turǵyndary poshtashylardyń jetispeýinen hat nemese gazet-jýrnaldar eki aptadaı keshigip jetetinin aıtyp jatty. Aýyldyq mekenderde ınternettiń joqtyǵy nemese jyldamdyǵy tómen bolýy saldarynan turǵyndar úshin baspa ónimderiniń mańyzdy buqaralyq aqparat quraly bolyp tabylatyny anyq.
«Bul jerde negizgi máselelerdiń biri - poshtashylardyń jalaqysynyń tómendigi bolyp otyr. Turǵyndardyń aıtýynsha, 12-25 myń teńgeni quraıtyn jalaqy qoldanystaǵy zańnamada bekitilgen jalaqynyń eń tómengi kórsetkishi 42500 teńge kólemine saı kelmeıdi. Joǵaryda atalǵandardyń negizinde, «Qazposhta» AQ qandaı zańnamanyń negizinde poshtashylarǵa joǵaryda keltirilgen jalaqy kólemin taǵaıyndaǵan? Sondaı-aq mundaı jumyskerlerdiń jalaqysyn ulǵaıtý úshin qandaı sharalar qarastyrylyp jatyr? Bul máseleni burynyraq basqa da depýtattar kótergen bolatyn. Biraq oń nátıje bergen joq jáne jaǵdaı ózgergeni baıqalmaıdy», - dedi Sh. Nýrýmov.
