Depýtattar áýe bıletteriniń qaıtarylmaýyna qatysty másele kóterdi
ASTANA. QazAqparat - Búgin Májiliste «Qazaqstan Respýblıkasynyń keıbir zańnamalyq aktilerine áýe keńistigin paıdalaný jáne avıatsııa qyzmeti máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda depýtattar áýe bıletteriniń qaıtarylmaýyna qatysty másele kóterdi.
«Avıakompanııalarǵa qatysty asa ózekti másele bar - bul aldyn ala satylyp alynǵan bıletterge qatysty qarajatty qaıtarmaý. Adamdar bir aı, eki aı buryn arzanyraq baǵaǵa ushaqqa bılet satyp alady, alaıda qandaı da bir jeke nemese qyzmettik jaǵdaılaryna baılanysty bıletten bas tartýǵa týra keledi. Alaıda, ol aqsha qaıtarylmaıdy. ıAǵnı, munda avıakompanııalar halyqtyń qarajatyn tárkilep jatqandaı. Men buny durys dep sanamaımyn», - dedi depýtat Sapar Ahmetov.
Onyń aıtýynsha, aldyn ala bılet satyp alyp, avıakompanııalar jumysyn aldyn ala kredıtteýge kómektesetin halyq aqshasyn qaıtaryp alýǵa da quqyly bolýy kerek. «Adamdar bıletten jaıdan jaı bas tartpaıdy ǵoı. Biz sol azamattardyń basyna túsken jaǵdaıdy túsinip, bıletterin qaıtaryp berýge tıispiz», - dedi S. Ahmetov.
Al Investıtsııalar jáne damý mınıstrligi Azamattyq avıatsııa komıtetiniń tóraǵasy Beken Seıdahmetovtyń aıtýynsha, bıletterdiń qaıtarylmaýy - bul avıakompanııalardyń ózderiniń ishki sheshimi. «Jeńildikpen nemese eń tómengi tarıfpen bılet satyp alǵandar úshin negizinen 20-30 paıyzdyq aıyppul sanktsııalary qarastyrylǵan bolýy kerek. Ortasha tarıfter, shekti tarıfter degen bolady. Osy tarıftermen bılet satyp alǵandar ony qaıtarǵanda aıyppul sanktsııalary alynbaıtyn bolýy kerek. Degenmen, zań jobasynda bul másele qarastyrylmaǵan», - dedi jýrnalısterge osy máseleni túsindirgen komıtet tóraǵasy Beken Seıdahmetov.
