Depýtattar «Atyraý-Astrahan» jolyn qalpyna keltirýdi baqylaýǵa aldy

NUR-SULTAN. QazAqparat - Búgin Májilis depýtattary Dúısenbaı Turǵanov, Sálimjan Naqpaev jáne Serik Erýbaev Atyraý oblysy Isataı aýdanynyń turǵyndarymen kezdesti, dep habarlaıdy QazAqparat QR Parlamenti Májilisiniń baspasóz qyzmetine silteme jasap.

Іs-sharada Atyraý-Astrahan jolynyń qurylys barysy talqylandy. Máseleni talqylaýǵa Indýstrııa jáne ınfraqurylymdyq damý mınıstrligi, «Qazavtojol», «Qazavtodor» kompanııalarynyń ókilderi, merdiger uıymdar men Atyraý oblysy ákimdiginiń ókilderi qatysty.

Turǵyndardy jumystyń keshigip bitýi, adam ólimine ákeletin jol apatarynyń kóbeıip ketýi alańdatyp otyr. Sondaı-aq, jergilikti turǵyndar joldyń ýaqtyly sýarylmaýynan bolatyn qalyń shańǵa shaǵymdanýda. Al klımattyń erekshelikteri bul máseleni odan ári ýshyqtyra túsedi. Turǵyndardyń jumys sapasyna qatysty suraqtary da kóp. Mysaly, mal aıdaý joly qamtamasyz etilmegen, bul keıinnen úlken qıyndyqtar týǵyzýy múmkin. Atyraýlyqtar jóndeý jumystary men onyń aıaqtalý merzimine baqylaýdy kúsheıtýdi suraıdy.

Atyraý-Astrahan joly 1975 jyly salynǵan. Onyń jóndeý jumystary 2019 jyly bastalǵan. Jalpy uzyndyǵy 277 shaqyrymdy quraıtyn tas joldy jóndeýge ketken shyǵyn 87,4 mıllıard teńgeni quraıdy. Jobalyq qatege baılanysty kezinde joldy qaıta jóndeý jumystary kesteden kesh kalǵan bolatyn. Búgin Indýstrııa jáne ınfraqurylymdyq damý mınıstrliginiń ókilderi joldaǵy qozǵalys bıylǵy jyldyń sońyna deıin ashyq bolatynyn, jumystardy tolyq aıaqtap, paıdalanýǵa berý 2023 jylǵa josparlanǵanyn atap ótti.

Depýtattar baqylaýdy kúsheıtý maqsatynda jergilikti turǵyndarmen osyndaı kezdesýlerdi toqsanyna bir ret ótkizýge kelisip, erekshe baqylaýǵa aldy.

Dúısenbaı Turǵanov jergilikti turǵyndar úshin qolaıly ómir súrý jaǵdaılary, olardyń qaýipsizdigi, óńirdiń damýy, jalpy elimizdiń tranzıttik-kóliktik áleýeti osyǵan baılanysty ekenin aıta kelip:

- Prezıdent Qasym-Jomart Kemeluly Toqaev bul máselege erekshe nazar aýdaryp, onyń memleketimizdiń áleýmettik-ekonomıkalyq damýy úshin mańyzdylyǵyn atap kórsetedi. Bul máseleni biz baqylaýǵa alyp qana qoımaı, jaqyn ýaqytta atyraýlyq depýtattar atynan Úkimetke arnaıy depýtattyq saýal joldaýdy josparlap otyrmyz. Sondaı-aq, turǵyndarmen kezdesýde Qarabaý-Inder tas jolyn qalpyna keltirý jumystarynyń barysymen tanystyq. Bul jerde másele qarjynyń jetkiliksizdiginen jumystardyń aıaqtalýyn keıinge qaldyrýda, - dedi.

Parlament depýtaty retinde májilismender respýblıkalyq bıýdjetti naqtylaý kezinde jobany qosymsha qarjylandyrýǵa qoldaý kórsetýge daıyn ekenin jetkizdi.