Depýtattar Astananyń bıýdjetin kóbeıtýdi usyndy
Sessııa jumysyna qala ákiminiń orynbasary Andreı Lýkın, qala aýdandarynyń ákimderi, qalalyq departamentter men basqarmalardyń jetekshileri, qoǵamdyq birlestikterdiń jáne buqaralyq aqparat quraldarynyń ókilderi qatysty.
Astana qalasynyń 2017-2019 jyldarǵa arnalǵan bıýdjetine ózgertýler men tolyqtyrýlar engizý týraly baıandamamen Astana qalasy ákiminiń orynbasary Andreı Lýkın sóz sóıledi. Qalanyń negizgi áleýmettik-ekonomıkalyq kórsetkishteriniń ósimine sáıkes naqtylaý kezinde bıýdjettiń kiris bóligin 11,0 mlrd.teńgege ulǵaıtý kózdelgen. Sonymen birge, respýblıkalyq bıýdjetti naqtylaý sheńberinde 77,5 mlrd teńge kóleminde transfertter qosymsha bólindi, dep málim etti ákimniń orynbasary.
Sondaı-aq, bıýdjet qarjysyn ıgerý monıtorıngi nátıjeleriniń negizinde shyǵystardy ishki qaıta bólý júrgizildi, ol qarjy elordany damytý boıynsha birqatar mindetterdi sheshýge baǵyttalady.
Atap aıtqanda, sý tasqyndaryna qarsy sharalarǵa, kóshelerdi mehanıkalandyrylǵan jınaý jumystaryna, jeńildetilgen dári-dármekpen qamtamasyz etýge, densaýlyq saqtaý nysandaryn jylýmen qamtýǵa, oqýlyqtar men oqý-ádistemelik keshendi satyp alýǵa, EKSPO-2017 kórmesine eriktilerdi daıyndaýǵa, apatty jáne eski úılerdi buzýǵa, ınvestıtsııalyq jobalardy iske asyrýǵa qarjy qarastyrylǵan.
Talqylaý barysynda depýtattar «Saryarqa» aýdanynyń ishki ister basqarmasy úshin ǵımarat salý, quqyq qorǵaý organdarynyń qyzmetkerlerin baspanamen qamtý, mektep jáne mektepke deıingi mekemelerdiń aýmaqtaryn qardan tazalaýǵa qarjy bólý máselelerin kóterdi.
Ekonomıka jáne bıýdjettik josparlaý basqarmasynyń jetekshisi Álıbı Jumaev depýtattarynyń qaraýyna «2016-2018 jyldary iske asyrýǵa josparlanǵan memlekettik-jeke-menshik áriptestik jobalarynyń tizimi týraly» máseleni shyǵardy. Ákimdiktiń ókimimen 10 balabaqsha engizilgen jobalardyń tizimi maquldandy. Qajet protsedýralardan ótip, kelisimsharttarǵa qol qoıylǵan soń áleýetti ınvestorlar joǵaryda atalǵan nysandardyń qurylysyna kirisedi, dep málim etti Á. Jumaev.
Sondaı-aq, Astana qalasy máslıhatynyń sheshimimen memlekettiń qajettilikterine jer telimderin alýǵa baılanysty jer telimderin nemese basqa jyljymaıtyn múlikti satyp alý týraly kelisimsharttardyń jobasy kelisildi, Astana qalasynda quqyq buzýshylyqtardyń aldyn alý boıynsha vedomstvoaralyq komıssııanyń, Astana qalasynda jer telimderine quqyqtar berý komıssııasynyń, Astana qalasy ákimdiginiń janyndaǵy 2020 jylǵa deıin óńirlerdi damytý baǵdarlamasy sheńberinde apatty úılerdi buzý boıynsha pılottyq jobany iske asyrý boıynsha Turǵyn úı komıssııasynyń quramdary bekitildi.