Depýtattar ár balaǵa 70 myń teńge kóleminde járdemaqy belgileýdi usyndy
«Áleýmettik saladaǵy memlekettik saıasattyń negizgi baǵyty - kópbalaly analardy, tolyq emes otbasynda bala tárbıelep otyrǵan analardy jáne damýynda ereksheligi bar balalardy tárbıelep otyrǵan analardy qoldaý. Kópbalaly otbasylardyń basym bóligi kóbinese jalǵa beriletin bólmelerde turady. Eger ıpoteka rásimdeý múmkin bolsa, ádette qurylys sapasy tómen, ekonom sanattaǵy bir bólmeli páter alady. Olar úshin memlekettik tegin turǵyn úımen qamtamasyz etý tájirıbesi joq, ıpotekalyq nesıe berýdiń jeńildetilgen sharttary qarastyrylmaǵan. Qomaqty bastapqy jarna talap etilip, joǵary paıyz mólsherlemesi qoıylady. Mundaı otbasylar memlekettiń qandaı qoldaýyna úmit artady? Ataýly áleýmettik kómekke (AÁK) me? Obektıvti túrde qarasaq, ol da naqty kómek bolyp turǵan joq», - dedi depýtat Gaýhar Tanasheva Úkimet basshysynyń orynbasary Altaı Kólginovtyń atyna joldaǵan saýalynda.
Onyń paıymynsha, AÁK-ge úmitker bolý úshin kópbalaly, jumys istemeıtin analarǵa júzdegen synaqtan ótý kerek. Qazaqstan Halyq partııasynyń fraktsııasy ataýly áleýmettik kómekti (AÁK) alyp tastaý qajet dep sanaıdy, óıtkeni ony alý úderisi kúrdeli.
«Bul jaǵdaıda balalarǵa tólenetin járdemaqynyń mólsherin arttyrý qajet. Ár balaǵa naqty kólemde, jumsaýǵa jetkilikti mólsherde biryńǵaı járdemaqy tólegen durys. Biz eń tómengi jalaqy mólsherinde ár balaǵa aıyna 70 myń teńge kóleminde memlekettik járdemaqy belgileýdi qarastyrýdy usynamyz. Máselen, 4 balaǵa beriletin járdemaqy 280 myń teńgeni, 2 balaǵa 140 myń teńge quraıtyn bolady.
Qazirgi ýaqytta 4 bala 55 340 teńge járdemaqy alady. Ár balaǵa aıyna 13 826 teńge bólinedi. Munda ınflıatsııanyń turaqty ósýi, ekonomıkalyq turaqsyz jaǵdaı, turǵyn úıdiń joqtyǵy jáne halyqtyń osy sanatyndaǵy adamdardyń turaqty jumyspen qamtylmaǵany eskerilmegen», - dedi depýtat.
Bul turǵyda ol joǵaryda atalǵan halyqtyń áleýmettik osal toptaryna arnalǵan járdemaqyny qalyptastyrý saıasatynda qazirgi naqty jaǵdaı qarastyrylmaǵanyn aıtty.
«Osy saladaǵy memlekettik organdar júrgizetin reformalardyń barysy týraly tolyq aqparat berýdi, sondaı-aq AÁK jáne 18 jasqa deıingi biryńǵaı balalar járdemaqysyn esepteý ádistemesin qaraýdy suraımyz», - dedi Gaýhar Tanasheva.