Depýtattar «ALJIR-diń yzǵarly sýyǵy» fılmin kórdi

NUR-SULTAN. QazAqparat - Senat Tóraǵasy Darıǵa Nazarbaeva bastaǵan Parlament depýtattary saıası qýǵyn-súrgin jáne totalıtarızm qurbandaryna arnalǵan «ALJIR» memorıaldy-murajaı kesheninde boldy, dep habarlaıdy QazAqparat.

Depýtattar saıası qýǵyn-súrgin qurbandaryn eske alý kúni Aqmol aýylyndaǵy «Qasiret qaqpasy» monýmentine gúl shoqtaryn qoıdy. Parlamentshiler «Alash», «ALJIR» zaldaryna ekskýrsııa jasap, «ALJIR-diń yzǵarly sýyǵy» derekti fılmin tamashalady.

«Búgin biz 20-ǵasyrdaǵy qýǵyn-súrgin qurbandaryn aza tutyp, eske alamyz. Biraq stalındik zulymdyqtar jaılaǵan aýyr jyldardaǵy qazaq halqynyń eń jaqsy qasıetteri týraly da aıtamyz. Týǵandar bir-birin joǵaltqan, ajyrap qalǵan qıyn kezeńde bizdiń halqymyz qatygez bolǵan joq, ózderiniń eń úzdik ulttyq erekshelikterin - qaıyrymdylyqty, yntymaqty, qıyndyqta kómek qolyn sozatyn asyl qasıetterin saqtap qaldy. Ǵasyrlar boıǵy ózine tán danalyǵyn tanytty. Biz bul kúnniń mán-maǵynasyn qazaqstandyqtardyń jańa býynyna mindetti túrde aıtýymyz kerek. Halqymyzdyń bastan keshken aýyr synaqtaryn eske alý bizdiń uly ıgiligimizdi - Qazaqstannyń táýelsizdigin saqtap, baǵalaýǵa túrtki bolady», - dep atap ótti Darıǵa Nazarbaeva.