Almatynyń 2040 jylǵa deıingi Bas josparyn túzetý kezinde turǵyndar usynysy eskerildi
ALMATY. KAZINFORM – Almaty máslıhatynyń kezekten tys sessııasynda qala ákiminiń orynbasary Beıbit Shahanov keshendi qala qurylysy saraptamasynyń oń qorytyndysyn alǵan 2040 jylǵa deıingi Bas jospardy túzetý jobasynyń negizgi erejeleri týraly baıandady.
Ol Bas jospardy túzetý jumystarynyń mańyzdy baǵyttarynyń biri qala turǵyndarymen ózara is-qımyl bolǵanyn atap ótti. Beıbit Shahanovtyń aıtýynsha, qoǵamdyq talqylaýlar barysynda kelip túsken usynystar men ótinishter saralanyp, zańnama talaptary men qala qurylysy shekteýleri eskerile otyryp, múmkindiginshe jobalyq sheshimderge engizilgen. Sonymen qatar strategııalyq ekologııalyq baǵalaýǵa jáne Bas jospardyń iske asyrylýyna odan ári qoǵamdyq baqylaý júrgizýge erekshe nazar aýdaryldy.
«Bas jospardy odan ári iske asyrýdyń mańyzy erekshe. Qujatty bekitý qalanyń keıingi damýyna negiz bolady, alaıda onda kózdelgen sheshimderdi dáıekti túrde júzege asyrý negizgi kezeń bolmaq. Osyǵan baılanysty Bas jospardyń iske asyrylýyna, qurylys parametrleriniń saqtalýyna, áleýmettik jáne ınjenerlik ınfraqurylymnyń ýaqytyly damýyna, sondaı-aq jasyl jelek pen tabıǵı aýmaqtardyń saqtalýyna turaqty monıtorıng júrgizýdi qamtamasyz etý qajet. Halyqpen baılanys ornatý jáne turǵyndardy negizgi jobalardyń iske asyrylý barysy týraly habardar etý de mańyzdy baǵyt bolyp qala beredi. Bul qala qurylysy sheshimderiniń ashyqtyǵyn arttyrýǵa jáne demografııalyq, kólik, ekologııalyq ári áleýmettik ahýaldaǵy ózgeristi der kezinde eskerýge múmkindik beredi», – dedi Beıbit Shahanov.
Onyń aıtýynsha, jańartylǵan qujat sońǵy derekterge negizdelgen jáne ekologııalyq, seısmıkalyq, kólik, áleýmettik jáne ınfraqurylymdyq shekteýlerdi eskere otyryp, qalanyń teńgerimdi damýyn qamtamasyz etýge baǵyttalǵan.
«Qalanyń aldynda Almatynyń tabıǵı áleýetin saqtaý, jaıly qalalyq ortany qamtamasyz etý, kólik baılanysyn jaqsartý, halyq sanynyń ósýine qajetti jaǵdaı jasaý jáne sonymen qatar qalanyń tarıhı biregeıligin saqtaý mindeti tur», – dedi Almaty ákiminiń orynbasary.
Eske salaıyq, byltyr Almatynyń damý baǵytyn aıqyndaıtyn qalanyń basty qujaty — Bas josparǵa ózgerister engizý boıynsha jumystar bastaldy. Keıin qalanyń 2040 jylǵa deıingi Bas josparyna ózgeris engizý boıynsha qoǵamdyq talqylaýlar ótti.
Keıin Almatynyń Bas josparyndaǵy ózgerister qashan bekitiletinin jazǵanbyz.
Bıyl maýsym aıynda Bas josparynyń strategııalyq ekologııalyq baǵalaýy boıynsha qoǵamdyq tyńdaýlar ótti.
