Depýtattar Almaty oblysynyń fermerlerimen AÓK-ti damytý máselelerin talqylady
ASTANA. KAZINFORM - Májilistegi «Aýyl» partııasy fraktsııasynyń depýtattary Serik Egizbaev, Jıgýlı Daırabaev jáne Erbolat Saýryqov Almaty oblysynyń Іle aýdanyndaǵy «Bereke» ındýstrııaldy aımaǵynda ornalasqan eksporttyq jemis-jıdek klasterimen aınalysatyn «Fruitart» seriktestigine baryp, kompanııanyń jumysymen tanysty.
«Fruitart» zaýyty – «Kazakh Invest» ulttyq kompanııasynyń jobasy, jylyna 15 000 tonna ónim óndiredi. Kásiporyn ónimi korporatıvtik klıentterge jáne bólshek saýda jelilerine, sonyń ishinde Eýropa Odaǵy, AQSh, Japonııa, Ońtústik Koreıa syndy damyǵan elder naryǵyna muzdatylǵan keptirilgen jemister men jıdekter jetkiziledi. Sondaı-aq Qytaı men Reseı naryǵyna eksporttalady. Onda 350 adam jumys isteıdi.
Depýtattar Memleket basshysynyń reformalaryn júzege asyrý aıasynda ózderiniń zańnamalyq jumystary men kásipkerlikti damytýdy memlekettik qoldaý sharalary týraly habardar etti.
– Memleket basshysy Qasym-Jomart Toqaev aýyl sharýashylyǵy ónimderin óńdeıtin otandyq zamanaýı kásiporyndar salý jaıynda Úkimetke tapsyrma bergen edi. Myna «FRUITART» zaýyty – sonyń birinshi kórinisi, alǵashqy zamanaýı kásiporyn. Onyń jumysymen tanysý úshin arnaıy keldik, – dedi Májilistegi «Aýyl» partııasy fraktsııasynyń jetekshisi Serik Egizbaev.
Depýtattar kásiporynnyń jumysymen tanysqannan keıin, eńbek ujymymen kezdesip, kóptegen ózekti máseleni talqylady. Zaýyt basshylyǵy depýtattarǵa jetistikterimen qatar kúrmeýli máseleleri jaıynda da aıtyp, kómek surady. Kásiporyn jetekshileriniń aıtýynsha, zaýyt joba boıynsha alǵan qaryzyn tolyq ıgergen. Alaıda, kompanııa barlyq ınvestıtsııalyq kredıt syıaqysynyń tolyq mólsherlemesin óz esebinen qarjylandyrýǵa májbúr bolyp otyr.
Seriktestik ókilderi «Almaty qalasynyń kásipkerlik jáne ınvestıtsııalar basqarmasy» KMM sýbsıdııalar boıynsha bereshegi qazir 3,8 mlrd teńge ekenin aıtty. Jyl sońyna deıin bul qaryz 5,4 mlrd teńgege jetedi. Kásiporyn basshylyǵy depýtattardan ınvestıtsııalyq sýbsıdııa alýǵa jáne mólsherlemeni jyldyq 6 paıyzǵa deıin tómendetýge kómektesýdi surady.
Depýtattar kásiporyn ókilderiniń máselelerin tyńdaǵan soń, nazarǵa alatynyn aıtty.
