Depýtattar áleýmettik sala qyzmetkerleriniń jalaqysyn kóterýdi usyndy

NUR-SULTAN. QazAqparat – Parlament Májilisiniń jalpy otyrysynda «Halyq Kommýnısteri» fraktsııasy áleýmettik qyzmetkerler eńbekaqysyn kóterýge qatysty usynys jasady, dep habarlaıdy QazAqparat tilshisi.

«Bizdińshe, Úkimet tarapynan halyqqa qyzmet kórsetý ortalyqtary jumysyna kóbirek kóńil bólý kerek. Osy ortalyqtar qyzmetkerleri úshin áleýmettik yntalandyrýǵa erekshe nazar aýdarý qajet», - dep toqtaldy Májilis depýtaty Magerram Magerramov Úkimet basshysy Asqar Mamınniń atyna joldaǵan depýtattyq saýalynda.

Osy oraıda ol atalǵan ortalyqtar qyzmetkerleriniń eńbekaqysy tıisti deńgeıde emes ekenin ári áleýmettik paket máselesine ekpin qoıý kerektigin jetkizdi.

«Qyzmetkerlerdiń koronavırýs nemese vırýsty pnevmonııaǵa shaldyǵýy qaýpi óte joǵary, olar turǵyndarmen tikeleı baılanysta jumys isteýde. Sonymen qatar halyqqa qyzmet kórsetý ortalyqtary qyzmetkerleriniń mártebesin aıqyndaýdy usynamyz. Olar memlekenttik jáne azamattyq qyzmetshiler sanatyna jatpaıdy», - dedi depýtat.

Budan bólek ol qarttar úıi, balalar úıi sekildi áleýmettik mekemeler qyzmetkerleri, beıimdeý ortalyqtary mamandary mańyzdy qyzmet atqaryp jatqanyn atap ótti.

«Tómen eńbekaqy men áleýmettik yntalandyrýdyń bolmaýy osy mekemelerdegi jumys jas mamandar úshin tartymsyz. Bul óz kezeginde kadrlar tapshylyǵy problemasyna alyp kelýde. Osy mekemelerdiń áleýmettik ári medıtsınalyq qyzmetkerleri eńbekaqyny kóteretin kezde umyt qalady», - dedi M. Magerramov

Bul turǵyda depýtat atalǵan mekemelerde jumys istep júrgen barlyq qyzmetkerler úshin laıyqty jumys jaǵdaıyn jasaýǵa qatysty usynys engizdi.