Depýtattar áleýmettik medıtsınalyq saqtandyrý boıynsha túzetýlerdi talqylaıdy
ASTANA. QazAqparat - Búgin Májilis spıkeri Nurlan Nyǵmatýlınniń tóraǵalyǵymen Májilistiń Bıýro otyrysy ótti, dep habarlaıdy QazAqparat.
Aldaǵy jalpy otyrysta halyq qalaýlylary qarsy barlaý qyzmeti týraly jáne oǵan ilespe zań jobasyn birinshi oqylymda qaraıdy dep kútilýde.
Sonymen birge, mindetti áleýmettik medıtsınalyq saqtandyrý máseleleri boıynsha túzetýler ekinshi oqylymda depýtattar nazaryna usynylmaq.
Palata osy kúni «Qazaqstan Respýblıkasy Jer kodeksiniń jekelegen normalarynyń qoldanysyn jáne «Qazaqstan Respýblıkasynyń Jer kodeksine ózgerister men tolyqtyrýlar engizý týraly» 2015 jylǵy 2 qarashadaǵy Qazaqstan Respýblıkasy Zańynyń qoldanysqa engizilýin toqtata turý týraly» 2016 jylǵy 30 maýsymdaǵy Qazaqstan Respýblıkasynyń Zańyna ózgerister engizý týraly» zań jobasyn qaraıdy.
Jáne Iranmen sottalǵan adamdardy berý týraly kelisimdi ratıfıkatsııalaý týraly zań jobasy boıynsha qorytyndy ázirleý merzimin taǵaıyndamaq.
