Depýtattar áleýmettik kásipkerlikti qoldaý týraly zań jobasyn ázirleıdi – Máýlen Áshimbaev
NUR-SULTAN. QazAqparat – QR Parlamenti Senatynyń tóraǵasy Máýlen Áshimbaev áleýmettik kásipkerlermen kezdesý ótkizdi, dep habarlaıdy QazAqparat tilshisi joǵary palatanyń baspasóz qyzmetine silteme jasap.
Senat tóraǵasy áleýmettik kásipkerlik shaǵyn jáne orta bıznesti damytý, halyqty jumyspen qamtý, áleýmettik problemalardy sheshý, sonymen qatar múmkindigi shekteýli azamattardy qoldaý úshin mańyzdy sala ekendigin eske saldy. Aldaǵy ýaqytta da memleket bul salaǵa shynaıy qoldaý kórsetýdi josparlap otyrǵandyǵyna nazar aýdartty.
«Memleket basshysy bul máselege aıryqsha nazar aýdarady. QR Prezıdenti naqty tapsyrma da bergen. Sondyqtan aldaǵy kezeńde memlekettik organdar tarapynan áleýmettik kásipkerlikke júıeli qoldaý kórsetilýi tıis. Erekshe qajettiligi bar adamdar men áleýmettik álsiz toptar kásipkerlikpen aınalysyp, jumysqa ornalasý máselelerin sheshý úshin olardyń múmkindikterin keńeıtýge aıryqsha nazar aýdarǵan jón. Tolyqtaı alǵanda, bul baǵyttaǵy negizgi qadamdardyń biri - áleýmettik kásipkerlik qyzmetin retteıtin jáne memleket tarapynan qoldaýdyń tıimdi tetikterin aıqyndaıtyn zań qabyldaý», - dedi Máýlen Áshimbaev.
Senat tóraǵasy qazirgi ýaqytta áleýmettik kásipkerlik kóptegen elde keńinen taralǵanyn atap ótti. AQSh, Ulybrıtanııa, Kanada jáne Germanııadaǵy áleýmettik kásiporyndar eldiń jalpy ishki ónimin 3-ten 5 paıyzǵa deıin qalyptastyrady.
«Biz birlesip zań jobasyn ázirleýimiz qajet. Búgingi otyrysty úlken jumystyń basy retinde qabyldaımyz. Áleýmettik kásipkerliktiń negizgi maqsattarynyń biri - erekshe qajettiligi bar adamdardy ortaǵa beıimdeý jáne olardyń áleýmettik, ekonomıkalyq belsendiligin arttyrý. Búginde elimizde áleýmettik jobalardy sátti júzege asyratyn kásipkerler bar jáne zań jobasyn ázirleý barysynda olardyń pikirleri men usynystary mindetti túrde eskerilýi tıis», - dedi Senat spıkeri.
Onyń atap ótýinshe, Qazaqstanda áleýmettik kásiporyndar qarym-qatynasyn retteý salasyndaǵy zańnamalyq baza, sonymen qatar memlekettik qurylymdar men áleýmettik bıznes arasyndaǵy ózara is-qımyldyń qajetti deńgeıi joq.
Máýlen Áshimbaev Senat janynan áleýmettik kásipkerlikti qoldaý jáne damytý jónindegi zań jobasyn ázirleýmen aınalysatyn jumys tobynyń qurylatyndyǵyn málimdedi. Jumys Májilispen birge júrgiziletin bolady.
Kezdesý barysynda áleýmettik kásipkerlik salasynyń ókilderi birqatar naqty usynystar engizip, salany odan ary damytýǵa qatysty oılarymen bólisti.
Sharaǵa Ulttyq ekonomıka mınıstri Rýslan Dálenov, Eńbek jáne halyqty áleýmettik qorǵaý mınıstri Birjan Nurymbetov, QR Parlamenti Májilisiniń depýtattary qatysty.
