Depýtattar «Alıans» pen «Temirbankti» biriktirip, aýyl sharýashylyǵy baǵytyndaǵy bir bank qurýdy usyndy
ASTANA. 21 maýsym. QazAqparat - Parlament depýtattary «Alıans» jáne «Temirbank» bankteriniń bazasynda aýyl sharýashylyǵy bankin qurýdy usynady.
Bul týraly búgin «Qazaqstan Respýblıkasynda mal sharýashylyǵyn damytýdyń ózekti máseleleri men perspektıvalary» atty taqyrypta ótken Parlamenttik tyńdaýda sóz sóılegen Májilis depýtaty Raýan Shaekın málim etti.
Depýtattyń aıtýynsha, búgingi tańda elimizdegi ekinshi deńgeıli bankterdiń kredıttik resýrstary kóptegen aýyl sharýashylyǵy taýar óndirýshileri úshin qoljetimsiz bolyp tabylady. Mundaı bankterdń aýyl sharýashylyǵy taýar óndirýshilerine qoıatyn talaby da qatal, usynatyn paıyzdyq mólsherlemeleri de joǵary. Sondyqtan da, depýtattar «Alıans bank» pen «Temirbankti» biriktirip, odan aýyl sharýashylyǵy baǵytyndaǵy bir bank uıymdastyrýdy usynady. Bul rette ondaı banktiń kredıttik portfeliniń 50 paıyzy aýyl sharýashylyǵy óndirisine ıkemdi sharttar boıynsha baǵyttalýy kerek. Al qalǵan 50 paıyzyn basqa salalarǵa baǵyttaýǵa da bolady.
Toqtala ketetin jaıt, parlamenttik tyńdaý barysynda Májilis spıkeri N. Nyǵmatýlın de elimizdiń ekinshi deńgeıli bankteriniń sharýalardy qarjylandyrý boıynsha ustanymyn tym tıimsiz dep baǵalaǵan bolatyn.
Jyl basynan beri «Samuryq-Qazyna» Ulttyq ál-aýqat qory» AQ «BTA-bank», «Alıans bank» jáne «Temirbankti» kapıtaldan shyǵarý boıynsha úderisti júrgizip jatqany belgili.
