Depýtattar Aqtóbedegi mys kompanııasyna áleýmettik jaýapkershilikti arttyrýdy tapsyrdy
AQTÓBE. QazAqparat - Aqtóbege jumys saparymen kelgen Májilis depýtattary Hromtaý aýdany, Kóktaý aýylyna bardy. Depýtattar zaýyt basshylyǵyna jol salý, aýyz sý, balalardyń jazǵy lageri sekildi máselelerdi birige sheshýdi tapsyrdy, dep habarlaıdy QazAqparat tilshisi.
Aqtóbeniń Kóktaý aýyly «Nurly kósh» baǵdarlamasymen salynǵan bolatyn. Munda Ózbekstannan kóship kelgen otandastarymyz qonystanyp, «Orys mys kompanııasy» JShS-ine jumysqa ornalasty. Zaýyttaǵy barlyǵy 1600 jumysshynyń 70 paıyzy aýyl turǵyny.
«Aqtóbedegi mys kompanııasyna aldymen kásipodaq qurý kerek. Jumysshylardyń quqyǵy qorǵalyp, jumys berýshilerdiń mindeti de bekitilgen jón. Bul kez kelgen quqyqtyq memlekette saqtalatyn zańdylyq. Al Qazaqstan quqyqtyq memleket dep esepteımiz. Ár jumysshy ózi baryp, jeke basynyń máselesin aıtý qajet emes. Bárin ujym bolyp sheshýi tıis»,- dedi Parlament Májilisiniń depýtaty Omarhan Óksikbaev. Kezdesý kezinde aýyl turǵyndary, jumysshylar balalar úshin lager uıymdastyrýdy usyndy. Sebebi, Aqtóbedegi iri óndiris oryndarynyń basym bóliginde jumysshylardyń balalaryna da jaǵdaı jasalǵan.
«Lager óte durys qozǵalǵan másele. Mys kompanııasy muny qolǵa alýy kerek. Zaýyt úshin balalardyń demalysyn tıimdi uıymdastyrý mańyzdy. Ol balalar erteń ata-anasynyń ornyn aýystyryp, kompanııaǵa jumys isteýge keledi. Kompanııa búgin balalardy qamqorlyǵyna alyp, jaqsylyq jasaýy kerek. Sonda ol balalar ósip, jaqsylyqqa jaqsylyqpen jaýap beredi. Memleket kompanııa úshin bir aýyl salyp, jumys kúshimen qamtýǵa jaǵdaı jasady. Endi kompanııa da áleýmettik máselelerdi sheshýi tıis»,- dedi Omarhan Óksikbaev.
Kompanııa ókilderiniń aıtýynsha, bıyl aýyldy kógaldandyrý jumystaryna 20 mıllıon teńge aýdaryldy. Bul qarjyǵa joldar tegisteledi. Negizinen turǵyndar kez kelgen máseleni aýyl ákimdigine aıtyp, kómek suraıdy. Al ákimdik bizge habar beredi. Osylaısha eki tarap máseleni birige sheshedi.
