Depýtattar aqparatqa qol jetkizýge qatysty zań jobasyndaǵy túzetýge qarsy shyqty
ASTANA. KAZINFORM – Búgin Parlament Májilisinde aqparatqa qol jetkizýge qatysty zań jobasyn tanystyrý kezinde depýtattar osy qujattaǵy jańa túzetýge narazylyq bildirdi.
Depýtat Abzal Quspan bul jobany Májilistiń Zańnama jáne sot-quqyqtyq reforma komıtetinde qarastyrý kezinde úlken synǵa ushyraǵanyn aıtty. ıAǵnı, qujat jobasynda depýtattar zań shyǵarý bastamasyn qoldanǵan jaǵdaıda, mindetti túrde Úkimettiń oń qorytyndysyn alý normasy qısynsyz.
«Nege? Bul ádettegi bir zańdarǵa qarama-qaıshy kelse bir jón. Bul jerde Konstıtýtsııanyń normasy buzylyp otyr. Atap aıtqanda, Konstıtýtsııadaǵy 61-baptyń 1-tarmaǵynda zań shyǵarý bastamasy Prezıdentke, Úkimetke jáne Parlament depýtattaryna tıesili dep anyq kórsetilgen. Al myna tanystyrylǵan zań jobasyndaǵy usynysty alyp qarasaq, onda depýtattardyń zań shyǵarý bastamasyn shekteý tikeleı kózdelgen. Sonymen qatar Prezıdenttiń «Kúshti Prezıdent - yqpaldy Parlament - esep beretin Úkimet» degen formýlasyna negizdelgen bastamasyna tikeleı qaıshy kelip otyr. Bul bastamaǵa sáıkes Úkimet Parlamenttiń aldynda esep berýi kerek bolsa, munda kerisinshe - Parlament depýtattaryn zań shyǵarýshylyq bastamada Úkimetke baǵyndyryp qoımaqshy», - dedi A. Quspan.
Kazinform tilshilerine bergen suhbatynda depýtat Abzal Quspan búgin tanystyrylǵan zań jobasynda Parlament depýtattary ázirlegen qujat jobalary boıynsha Qazaqstan Úkimetiniń qorytyndysyn eskere otyryp, qoǵamdyq talqylaý rásimderin ótkizý mindetti sanalatyny jazylǵanyn aıtty.
«Zań shyǵarý bastamasy tek úsh sýbektige ǵana berilgen. Osy jerde Úkimet zań shyǵarý bastamasyn ishinara shektegisi keledi. Depýtattar zań shyǵarý bastamasyn qoldanǵan jaǵdaıda, mindetti túrde Úkimetke joldap, Úkimettiń oń qorytyndysy bolǵanda ǵana shyǵara alatyndaı normany engizip qoıǵan. Zań jobasyndaǵy osy usynysqa qarsymyz», - dedi Abzal Quspan.
Depýtattyń pikirinshe, zań jobasyndaǵy bul normany Parlament qabyldamaıdy.
Óz kezeginde depýtat Ashat Aımaǵambetov te qujatta oıǵa qonymsyz normalar bar ekenin rastady.
Mádenıet jáne aqparat vıtse-mınıstri Danııar Qadyrov bul normany usynar aldynda osy aqparatqa qol jetkizý salasy zerdelengenin aıtty.
«Sonda depýtattardyń zańnama bastamasyn jasar aldynda osy BAQ ókilderimen, úkimettik emes uıymdarmen, belsendilermen talqylaý múmkindigin berý retinde usyndyq. Osy maqsatty ǵana kózdedik», - dedi vıtse-mınıstr.
