Depýtattar Abaı óleńderin oqydy

ASTANA. QazAqparat – Abaı kúnine oraı Májilistiń bir top depýtaty uly aqynnyń shyǵarmashylyǵynan úzindi oqydy, dep habarlaıdy QazAqparat tilshisi.

Máselen Respublica partııasynyń tóraǵasy Aıdarbek Qojanazarov uly aqynnyń eńbek, sharýashylyq taqyrybyndaǵy «Túbinde baıandy eńbek egin salǵan» óleńin ulttyq kıim kıip, at ústinde otyryp oqyp berdi.

«Abaı atamyzdyń shyǵarmalary búgingi kúnge deıin ózektiligin joǵaltpaǵan óshpes shamshyraq deýge bolady. Jolsilter óleńder. Osy jolsilter bolǵan, ómirime septigin tıgizgen shýmaqtardy aıtyp bersem», - dedi Aıdarbek Qojanazarov Instagram paraqshasynda jarııalanǵan vıdeoda.

Sonymen qatar ol estafetany Qostanaı qalasynyń ákimi Marat Júndibaevqa joldap, shaharda Abaı eskertkishin ashý kerektigin juqalap jetkizedi.

Al Ońtústik Koreıada júrgen depýtat Oljas Quspekov Seýl qalasynda Abaı Qunanbaıulynyń qurmetine ornatylǵan bıýst janynda «Senbe jurtqa, tursa da qansha maqtap» degen óleńin oqydy.

Abaı óleńderin oqý chellendjin kvazımemlekettik uıymdar men qutqarýshylar da jalǵastyryp jatyr. Máselen, «Qazposhta» basqarma tóraǵasy Ásel Janasova «Kózimniń qarasy» ánin oryndady.

Al Aqmola oblysy Jaqsy aýdandyq tótenshe jaǵdaılar bóliminiń bastyǵy Birjan Ábilmajenov «Jasymda ǵylym bar dep eskermedim» degen óleńin oqyp berdi.

8 tamyz kúni Tanymal ánshi Dımash Qudaıbergen Abaı Qunanbaıulynyń týǵan kúni qarsańynda tyń chellendj bastaǵan edi.

Chellendjdi Mádenıet jáne sport mınıstri Ashat Oralov jáne basqa da kóptegen Qazaqstan azamattary qoldap, áleýmettik jelilerde Abaı óleńderin oqyǵan vıdeolaryn salyp jatyr.

QR Prezıdentiniń Teleradıokesheniniń, sonyń ishinde QazAqparat agenttiginiń ujymy atalǵan chellendjden tys qalmady.