Depýtat zorlyq jasaǵandarǵa jazany kúsheıtýdi usyndy
NUR-SULTAN. QazAqparat - Elordada QR Parlamentiniń Májilis depýtaty Nurjan Áltaevtyń bastamasymen zorlaý qylmysyna qatysty zańdy qataıtý máselesi boıynsha dóńgelek ústel ótip jatyr, dep habarlaıdy QazAqparat tilshisi.
QR Bas prokýratýrasy, «NurOtan» partııasynyń qoǵamdyq uıymdar men advokattardyń qatysýymen ótken jıynda QR Parlamentiniń Májilis depýtaty Nurjan Áltaev zorlaý qylmysyn orta aýyr qylmystan aýyr qylmys túrine aýystyrýdy usyndy.
«Áıelderge qatysty –zorlyq-zombylyq óte kóbeıip ketti. Bul bizdiń namysymyzǵa tıetin tendentsııa. Sondyqtan, zorlaý qylmysyn orta aýyr sanattan aýyr sanatqa ótkizýimiz kerek. Analarymyz ben qaryndastarymyzdyń aryn taptatyp qoıyp, qarap otyrsaq, eldigimiz qaısy? QR Prezıdenti Qasym-Jomart Toqaev bul máseleni kóterip, aldaǵy Joldaýynda osyǵan qatysty naqty tapsyrmalar beretinin aıtty. Biz de osy máselege óz únimizdi qosý úshin bas qosyp otyrmyz», - degen depýtat qazaq tarıhynda mundaı qylmys ólimmen jazalanǵanyn eske aldy.
«Eger zorlaý qylmysyn aýyr sanatqa ótkizsek, eki jaqtyń kelisimimen isti jabý múmkin bolmaıdy. Zorlyq jasaǵan adamdy bas bostandyǵynan aıyrý jazasyn da qatańdatyp, merzimin uzartý qajet degen oıdamyn. Al zorlyqqa tap bolǵan áıel adamdarǵa tergeý bastalǵan kezden bastap barlyq jaǵdaı jasalýy kerek. Birinshgiden, psıholog bólinýi kerek. Ekinshiden, memlekettiń qarjylandyrýymen advokat bólinýi kerek. Kýágerlerdi qorǵaý júıesi, zardap shegýshini qorǵaý júıesi boıynsha da zorlyq kórgen adamnyń quqyǵy qorǵalýy qajet», - dedi Nurjan Áltaev.
Depýtat adam zorlaý sııaqty aıýandyq qylmys jasap sottalǵanymen, merziminen buryn bosap jatqandar bar ekenin de aıtty.
«Osyndaı qylmys jasaǵany úshin sottalǵandardyń keıbiri merziminen buryn bosap jatady. Olaı bolmaýy kerek. Biz dál osy zorlyq qylmysy úshin sottalǵan adamdardy merziminen buryn shartty bosatý babyn zańnan alyp tastaý kerek degen usynys engizbekpiz», - dedi ol.
