Depýtat jýrnalıske kúsh qoldanǵan polıtsııa qyzmetkerleriniń áreketine baǵa berýin surady
ASTANA. Qazannyń 24-i. QazAqparat - Parlament Májilisiniń depýtaty Jarasbaı Súleımenov Іshki ister mınıstri Serik Baımaǵanbetovke joldaǵan saýalynda jýrnalıske qoqan-loqqy kórsetken polıtsııa qyzmetkerin tártipke shaqyrýyn talap etken,
dep habarlaıdy QazAqparat.
Depýtattyń saýal joldaýyna Qyzylorda qalasynda oryn alǵan óreskel oqıǵa sebep bolǵan. Jábirlenýshi - respýblıkalyq «Aıqyn» gazetiniń tilshisi Mıýa Baınazar mádenı sharaǵa qatyspaq bolyp, eki sábıin jetelep teatrǵa kelgende, ony kire beriste polıtsııa qyzmetkerleri qarsy alyp, «Siz massyz» dep ishke kirgizbeıdi.
«Ol ol ma, qyzdy-qyzdymen soqtaldaı-soqtaldaı jigitter dúıim jurttyń aldynda tilshiniń qolyn burap, sábılerdiń shyryldap jylaǵanyna qaramastan kókpar tartqandaı qylady. Bul - baryp turǵan soraqylyq. «Et sasysa tuz sebem, tuz sasysa - ne sebemniń keri». Polıtseıler gazetke syn jazdy dep ózderiniń kásibı mindetterin adal atqaryp júrgen jýrnalısterdiń kózin shyǵaryp, basyn jara berse ne bolady?
Jýrnalıske óshigý, oǵan kúsh qoldaný - bul, saıyp kelgende, Qazaqstan Respýblıkasy Konstıtýtsııasynyń Zań aldynda jurttyń bári teń, adamnyń qadir-qasıetine qol suǵylmaıdy, zorlyq-zombylyq jasaýǵa, basqadaı qatigezdik, jábir kórsetýge bolmaıdy degen baptaryn belden basý bolyp tabylady. Qurmetti Serik Nurtaıuly, osy aıtylǵandardy negizge ala otyryp, istiń anyq-qanyǵyna jetýińizdi jáne jýrnalıske kúsh qoldanǵan polıtsııa qyzmetkerleriniń áreketine baǵa berýińizdi suraımyn», degen óz saýalynda depýtat Jarasbaı Súleımenov.
Parlament Májilisiniń Apparaty osy saýaldy Іshki ister mınıstrine joldady. Zań boıynsha bir aı merzim ishinde mınıstr depýtatqa jaýap berýi qajet.
