Depýtat JOO janynan mıkroshemalardyń ulttyq dızaın-ortalyǵyn qurýdy usyndy

ASTANA. KAZINFORM — Májilis depýtaty Ábýtálip Mútáli Premer-mınıstrdiń atyna mıkroshemalar óndirisin damytý jóninde saýal joldady.

— Elimizde mıkroshemalardy modeldeý men synaqtan ótkizýge arnalǵan zerthanalar, bilim berý baǵdarlamalary, ǵylymı-zertteý ınfraqurylymy jáne memlekettik qoldaý sharalary jetkiliksiz. Salada halyqaralyq tájirıbesi bar ınjenerler men tálimgerler tapshy, al ýnıversıtetter men ónerkásip arasyndaǵy baılanys álsiz. Saldarynan mıkroshemalardy ımporttaýǵa májbúrmiz. Alaıda, eń ókinishtisi, jahandyq jartylaı ótkizgishter ındýstrııasynan shet qalyp otyrmyz, — dedi depýtat.

Ol Úkimetke chıpter dızaıny salasyn damytýǵa arnalǵan keshendi memlekettik saıasatty ázirlep, bekitýdi usyndy.

— Úkimet shuǵyl ári naqty sharalar qabyldaýy qajet. Keshendi memlekettik saıasat aıasynda ýnıversıtetter men kolledjderde zerthanalar ashý, mıkroshemalardyń ulttyq dızaın-ortalyǵyn quryp, jobalaý jáne testileý ınfraqurylymyn damytý, ǵylymı jobalar men startaptardy qoldaý, sondaı-aq mıkroshemalardy jobalaý boıynsha oqý baǵdarlamalaryn engizý qolǵa alyný kerek, — dedi Ábýtálip Mútáli.

Budan buryn Janarbek Áshimjan Altel, Tele2, Beeline kompanııalarynyń tarıf saıasatyn «sóz baılasý» faktisine tekserýdi surady.