Depýtat JOO-lardaǵy bilim sapasy týrasynda: stýdentter is júzinde sabaqqa qatyspaı júr
ASTANA. KAZINFORM — Májilis depýtaty Ábýtálip Mýtáli sapasyz bilim beretin ýnıversıtetterdi baqylaý máselesine qatysty usynys aıtty.
— Sońǵy jyldary joǵary jáne orta bilim berý júıesinde dabyl qaǵatyn jaǵdaılar bolyp jatyr. Keıbir jekemenshik ýnıversıtetterde, kolledjderde stýdentterdi resmı tirkeıdi, biraq ári qaraı «stýdent oqý úderisine qatysyp jatyr ma», «oqý baǵdarlamasyn meńgerip jatyr ma» — bul jaǵynan bilim berý mekemesi salǵyrttyq tanytyp otyr. Bul rette, stýdentter oqýǵa qabyldanǵandar tiziminde bolǵanymen, is júzinde sabaqtarǵa qatyspaıdy nemese baǵdarlamalardy aıaqtamaıdy, biraq dıplomdaryn maman bolyp shyqty dep kedergisiz alyp jatyr. Bolashaqta mundaı qaǵaz júzinde ǵana kásibı mamandar jetistikke jete qoıady dep sený qıyn. Kerisinshe, ómirin jeńildetemin dep keıin jumyssyzdyq naryǵyn toltyryp, memlekettiń áleýmettik baǵdarlamalarynyń kómegine táýeldi bolyp qala ma degen kúdik bar, — dedi Ábýtálip Mýtáli Májilistiń jalpy otyrysynda Úkimet basshysynyń atyna joldaǵan depýtattyq saýalynda.
Onyń aıtýynsha, ýákiletti organnyń málimeti boıynsha sońǵy jyldary 25 ýnıversıtettiń 60 lıtsenzııalyq qosymshasy toqtatylǵan. Demek, saladaǵy júıeli quqyq buzýdy joıý men baqylaý tetikterin kúsheıtý boıynsha tııanaqty jumys qajet. Búgingi jaǵdaıda bilim berý sapasyn baqylaýdyń dástúrli ákimshilik tetikteri jetkiliksiz. Tsıfrlandyrý dáýirinde bilim berý salasynda qalam men qaǵazben jumys isteý utymsyz.
— Aralyq jáne qorytyndy emtıhandar men attestatsııalardy tsıfrlandyrý erekshe mańyzǵa ıe. Proktorıng pen jeke basty sáıkestendirýdi paıdalana otyryp, osy rásimderdi tsıfrlyq formatta júrgizý bilim berý protsesiniń ashyqtyǵyn qamtamasyz etedi, sybaılas jemqorlyq nemese sýbektıvti táýekelderdi azaıtady, nátıjelerdi avtomatty túrde tirkeıdi jáne baǵalaýdy qoldan ózgertý múmkindigin boldyrmaıdy. Ýnıversıtetterdiń ádiletsiz tájirıbesine tsıfrlyq tosqaýyl qoıýymyz kerek. Memleket eń úzdik halyqaralyq standarttarǵa sáıkes ozyq bilim berý jaǵdaılaryn jasaýy qajet. Dál osy tsıfrlyq attestattaýdyń obektıvti nátıjeleri bilim berý uıymdarynyń jaýapkershiligin arttyrý jáne kadrlardy daıarlaý sapasyna memlekettik baqylaýdy kúsheıtý úshin negiz bolýǵa tıis, — dedi depýtat.
Onyń paıymynsha, qoldanystaǵy bilim berý standarttary men baqylaý tetikteri qazirgi tsıfrlyq júıelerdiń múmkindikterin eskermeıdi. Osyǵan baılanysty kóptegen joǵary oqý ornynda bilimdi tekserý formaldy bolyp qala beredi jáne mamandardy daıarlaýdyń tıisti sapasyn qamtamasyz etpeıdi.
— Joǵaryda aıtylǵandarǵa baılanysty Úkimetten jasandy ıntellekt bazasynda proktorıngti, jeke tulǵany tsıfrlyq sáıkestendirýdi jáne taldamalyq júıelerdi, sonymen qatar joǵary oqý oryndarynda bilimdi baqylaýdyń tsıfrlyq tehnologııalaryn mindetti túrde paıdalana otyryp, joǵary bilimniń memlekettik standarttaryna ózgerister engizýdi qamtamasyz etýdi jáne «Memlekettik biryńǵaı proktorıng júıesin» engizýdi suraımyz. Munymen qosa, naqty merzimderi, jaýapty tulǵalary jáne engizý tıimdiligin baǵalaý kórsetkishteri bar joǵary oqý oryndarynda oqý protsesin baqylaýdyń jáne attestattaý rásimderiniń tsıfrlyq quraldaryn engizýdiń jol kartasyn ázirleýdi suraımyn, — dedi Ábýtálip Mýtáli.
Budan buryn habarlanǵandaı, keıingi bes jylda sapasyz bilim beretin joǵary oqý oryndarynyń sany 16-ǵa qysqardy.
