Depýtat joldaǵy apattardyń kóbeıýine kináli mekemelerdi tekserýdi surady
Búgin Májilistiń jalpy otyrysynda depýtat Erbolat Saýryqov elimizde jol-kólik oqıǵalarynyń kóbeıýine kináli mekemelerdi tekserýdi surady, dep habarlaıdy Kazinform.
«Derekter boıynsha 2023 jyldyń on aıynda elimizde 11 myń 618 jol-kólik oqıǵasy boldy. Onyń saldarynan 1942 adam kóz jumdy. Sonyń arasynda 246 kámeletke tolmaǵan jasóspirim jol ústinde jan tapsyrǵan. Sonymen qatar, jaralanǵan 14 myń 456 adam tirkeldi. Osylardyń ishinen qanshamasy múgedek boldy. Buǵan baılanysty birneshe sebepti atap ótpekpin. Solardyń sheshilý joldaryn Úkimetten suraımyn jáne Bas prokýratýra osy máselelerge qatysy bar barlyq mekeme men jaýapty tulǵalardyń qyzmetin tekserýi qajet dep esepteımin», - dedi E. Saýryqov óziniń depýtattyq saýalynda.
Bul turǵyda ol júrgizýshi kýáliginiń satylýyna qatysty jemqorlyq problemalary qashan sheshiletinin surady.
«Bizdegi tehnıkalyq tekserý ortalyqtarynyń basym bóliginiń bergen saraptamalary jalǵan. Olardyń qolyna aqsha qystyrsań bolǵany, qalaǵan qujatyńdy alasyń. Sondyqtan da eski mashınalar tehnıkalyq jaǵynan syn kótermese de, trassada júr. budan basqa, oń rýldi kólikterdiń kóbeıýi nemese oń rýldi kólikpen adam tasymaldaý bıznesiniń artýy beleń alyp barady», - dedi depýtat.
Onyń paıymynsha, InDrive, ıAndeks, sondaı-aq arnaıy jarnamalaý arqyly zańsyz adam, júk tasıtyn taksılerdiń kóbeıýi, qalaaralyq taksı bıznesiniń «kóleńkeli» ekonomıkany kúsheıtýine qatysty másele sheshilmeı otyr.
«Aýyr júk kólikteriniń shamadan tys júk artýy, onyń saldarynan jolda dóńgelekteriniń jarylýy, júkteriniń shashylýy nemese jol erejesin saqtamaýy sııaqty problema bar. Munymen qosa, jol sapasyna da erekshe toqtalý qajet. Oblystyq mańyzdaǵy jáne aýyl aralaq joldar kóp jerlerde syn kótermeıdi. Bul da jol apatynyń birden bir sebebine aınalǵan», - dedi Erbolat Saýryqov.
