Depýtat: JI salasynda basty mindet – azamattardyń quqyǵyn qorǵaý

ASTANA. KAZINFORM – Májiliste jasandy ıntellekt zań aıasynda parlamenttik tyńdaýlar ótip jatyr. Іs-shara barysynda qazaqstandyq kompanııalar men memlekettik organdar ázirlegen daıyn tsıfrlyq sheshimder kórmege qoıyldy.

Depýtat Ekaterına Smyshlıaeva aıtýynsha, kórmede logıstıka, transport, krımınalıstıka, memlekettik qyzmet kórsetý jáne medıtsına salasyna arnalǵan jasandy ıntellektke negizdelgen jobalar usynylǵan.

– Bul jerde jospar emes, naqty qoldanysqa engen sheshimder kórsetildi. Bir bóligi pılottyq rejımde bolsa da, alǵashqy nátıjeler bar, – dedi ol.

Depýtattyń aıtýynsha, jasandy ıntellektti damytý memlekettik saıasattyń basym baǵyty. Qazaqstan bul kezeńge daıyndyqpen keldi. Tsıfrlandyrýǵa jasalǵan júıeli qadamdar qoǵamdy jańa tehnologııalardy qabyldaýǵa beıimdedi dep atap ótti.

– Jańa zań jobasy halyqaralyq tájirıbege súıenip ázirlengen. Basty mindet – qaýipsizdik pen azamattardyń quqyqtaryn qorǵaý. Joǵary táýekel týdyratyn júıelerge ǵana naqty talap qoıylady, al orta jáne tómen deńgeıli júıelerge retteý jeńildetilgen, – dep túsindirdi Smyshlıaeva.

Onyń aıtýynsha, basty táýekelder derbes derekterdiń qorǵalýy, algorıtmderdiń burmalanbaýy jáne paıdalanýshylardyń jasandy ıntellekt júıesimen ózara áreketteskenin bilý quqyǵy. Sonymen birge Qazaqstanda esepteýish qýattar men ulttyq JI-platforma qurýǵa memleket erekshe nazar aýdaryp otyr.

– Aldaǵy úsh jyl sheshýshi kezeń. Tehnologııalardy tıimdi engizý arqyly azamattar onyń naqty paıdasyn sezinýi tıis, – dedi depýtat.

Buǵan deıin Premer-mınıstr Oljas Bektenovtiń tóraǵalyǵymen Tsıfrlyq shtabtyń otyrysy ótken bolatyn. Onda Memleket basshysynyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýynda qoıǵan mindetterge nazar aýdaryldy.