Depýtat jer qoınaýy zań jobasy týrasynda: Úkimettiń múddesin qorǵaıtyn baptar joq
ASTANA. KAZINFORM – Búgin Parlament Májilisinde «Jer qoınaýy jáne jer qoınaýyn paıdalaný týraly» Kodekske jańa túzetýlerdiń tanystyrylymy ótti.
Zań jobasy Májilistiń birqatar depýtatynyń bastamasymen daıyndaldy. Olardyń qatarynda Májilis tóraǵasynyń orynbasary Albert Raý da bar.
Qujatty depýtat Vıktor Avershın tanystyrdy. Onyń aıtýynsha, qaralyp otyrǵan zań jobasy jer qoınaýyn paıdalaný salasyndaǵy ashyq básekelestik tártipti nyǵaıtýǵa baǵyttalǵan. Sonymen qatar, derekter bazasy jáne tsıfrlandyrý tetigi retinde Jer qoınaýyn paıdalanýdyń biryńǵaı portalyn zańnamalyq túrde bekitý eskerilgen. Qujat aıasynda jańa normalar jer qoınaýyn paıdalanýǵa qatysty zań buzý áreketterine, favorıtızm men reıderlik is-qımyldardy boldyrmaýǵa múmkindik beredi.
«Budan bólek, tájirıbelik óndiris maqsatynda óndirýdi syltaý etip, qatty paıdaly qazbalardy jasyryn óndirýge de tyıym salynady jáne ol boıynsha ken ornyn barlaýǵa arnalǵan lıtsenzııa dereý qaıtarylady», - dedi ol.
Qujat jobasyn talqylaý barysynda Májilis depýtat Baqtyqoja Іzmuhambetov ondaǵy keıbir normaǵa qarsylyǵyn aıtty. Tanystyrylym aıaqtalǵanan keıin depýtat ne úshin eskertý aıtqanyn túsindirdi.
«Myna zań jobasyn qaraýǵa qaı ýaqyta jáne kim Úkimetke ótinim joldady? Úkimet oǵan qorytyndyny qalaı berdi? Otyrys barysynda sony suradym. Zań jobasyn daıarlaǵandar suraqtarymyzǵa da jaýap bere almady. Men 20 jyldan astam jer qoınaýyn paıdalaný salasyn basqarǵan adammyn. Sondyqtan bul saladaǵy zańnamanyń mán-jaıyn bilmesem, osy baǵyttaǵy talqylaýlarǵa aralaspas edim. Zań jobasy jumys tobynda qaralmaǵan, ıaǵnı biz ony bastamadyq, biraq Úkimet «bári durys» degen qorytyndysyn berip otyr... Kez kelgen zań memlekettiń múddesin qorǵaý kerek. Áńgime osynda. Atap aıtqanda, jer qoınaýyna qatysty zańǵa engizilgen ózgerister men tolyqtyrýlarda Qazaqstannyń múddesin qorǵaıtyn baptar bolýy kerek. Al eger myna baptardy (usynylyp otyrǵan) qarasańyzdar, ol jerde múdde joǵalyp ketip tur. Osyny túsingennen keıin aıtyp otyrmyn. Mynany oqyp shyqsaq, Úkimet kóp nársege aralasa almaıdy. Zań jobasynda Úkimettiń múddesin qorǵaıtyn baptardy kórmedim. Jumys tobynda talqylap, kelisimge kelýimiz kerek. Eshqandaı talqylaýsyz, tanystyrýsyz Úkimetpen kelisilgen degen baptardy kórsetip otyr. Olaı bolmaıdy ǵoı?! Endi Májilistegi jumys tobyndaǵy talqylaý kezinde, zań jobasyndaǵy kemshilikterdi egjeı-tegjeıli aıtamyz», - dedi B. Іzmuhambetov tilshiler suraǵyna jaýap bere otyryp.
