Depýtat jataqhana oryndaryn bóletin ulttyq tsıfrlyq platformany qurýdy usyndy
ASTANA. KAZINFORM – Búgin Parlament Májilisiniń jalpy otyrysynda depýtat Nurgúl Taý stýdentter jataqhanasy máselesin kóterdi.
- Stýdentterdiń qaýipsiz ári sapaly ortada bilim alýy – memlekettiń strategııalyq mindetteriniń birine aınalyp otyr. Bul rette, Ulttyq statıstıka bıýrosynyń derekteri boıynsha 2025–2026 oqý jylynyń basynda Qazaqstanda 678 myń stýdent bilim alǵan. Olardyń 364 myńy – aımaqtardan kelgen stýdentter. 115 myń stýdent resmı túrde jataqhanaǵa muqtaj, al olardyń tek 95 myńy ǵana naqty túrde jataqhanalarmen qamtamasyz etilgen. Bul resmı derekter boıynsha keminde 20 myń stýdenttiń baspanaǵa muqtajdyǵyn bildiredi. Demek, stýdentterdiń jataqhanalarmen resmı qamtamasyz etilý deńgeıi – shamamen 80% paıyz. Bul kórsetkish jaman emes. Alaıda, Joǵary aýdıtorlyq palatanyń esebine sáıkes, «Qarjy ortalyǵy» aktsıonerlik qoǵamynyń derekteri boıynsha jataqhanalardaǵy oryn tapshylyǵy 33 myń orynǵa jetedi, - dedi Nurgúl Taý Úkimet basshysynyń atyna joldaǵan saýalynda.
Aıta ketý kerek, keıingi jyldary bul baǵytta birshama jumystar da atqaryldy, jańa jataqhanalar salyndy, oryn tapshylyǵy qysqardy. Ǵylym jáne joǵary bilim mınıstrligi de, joǵary oqý oryndary da jaǵdaıdy jaqsartýǵa múddeli.
- Alaıda máseleni túbegeıli sheshý úshin Úkimet deńgeıinde ońtaıly úılestirý, turaqty baqylaý jáne birneshe memlekettik organnyń kúshin biriktiretin júıeli tásil qajet dep sanaımyz. Osyǵan baılanysty Úkimet deńgeıinde kelesi sharalardy qarastyrýdy usynamyz. Birinshiden, memlekettik jáne jekemenshik joǵary oqý oryndaryn qamtıtyn stýdenttik turǵyn úıdiń biryńǵaı ulttyq tsıfrlyq platformasyn ázirleý máselesin pysyqtaý qajet. Platformada ótinim berý, elektrondy kezek, onlaın brondaý, tsıfrlyq kelisimshart jáne jataqhana oryndarynyń naqty ýaqyttaǵy esebi kózdelýi tıis. Ekinshiden, joǵary oqý oryndarynyń qyzmet tıimdiligin baǵalaý júıesine stýdentterdi jataqhanamen qamtamasyz etý kórsetkishterin engizý múmkindigin qarastyrý mańyzdy, - dedi depýtat.
Onyń paıymynsha, jataqhana salýǵa, rekonstrýktsııalaýǵa jáne kúrdeli jóndeýge ınvestıtsııa salatyn joǵary oqý oryndary men ınvestorlar úshin yntalandyrý tetikterin, onyń ishinde salyq boıynsha jeńildikterdi qarastyrý kerek. Stýdenttik jataqhanalar salý baǵytyndaǵy memlekettik-jekeshelik áriptestik tetikteriniń tıimdiligine taldaý júrgizip, ınvestorlar úshin tartymdy jańa yntalandyrý sharalaryn ázirleý qajet.
- Ákimdikterdiń qyzmetin baǵalaý kórsetkishterine stýdenttik jataqhana qurylysyna arnalǵan jer ýchaskelerin bólý máselesin engizý jáne joǵary suranys bar óńirler boıynsha arnaıy jospar bekitý kerek, - dedi Nurgúl Taý.
Buǵan deıin elimizde stýdentterge qansha jataqhana orny jetispeıtinin jazǵan edik.
