Depýtat jastarǵa beriletin baspana talaptaryn jeńildetýdi surady
Elbasy N. Nazarbaevtyń bastamasymen 2019 jyly «Jastar jyly» ashylǵanda Nur-Sultan, Almaty, Shymkent qalalarynda jastarǵa jyl saıyn 1000 páter berý usynylǵan edi.
«Munda ótinish berýshiniń aı saıynǵy tabysyn keminde 40 AEK mólsherinde rastaıtyn sońǵy alty aıdaǵy tabysy týraly anyqtama kórsetýdi talap etedi. Baǵdarlamanyń basynda bul somma 101 000 tengeni qurasa, 2021 jyldan bastap bul 116 600 tengeni qurady. Ulttyq statıstıka bıýrosynyń málimeti boıynsha respýblıkada 20-29 jastaǵy azamattarymyzdyń sany 2 537 252-ge jetti. Qalada turatyn jastardyń úlesi – 1 510 892. Bul kórsetkish jyldan jylǵa artyp keledi», - dep atap ótti depýtat Májilistiń plenarlyq otyrysynda.
Halyqtyń orta eseppen jan basyna shaqqandaǵy tabystaryn baǵalaý boıynsha, bul mólsher 2021 jyldyń 1 toqsanyna Shymkent qalasynda 76 982 teńge, Almaty qalasynda 166 554 teńge, Nur-Sultan qalasynda 179 722 tengeni qurap otyr.
«Óńirlerge jumys sapar barysynda jastar tarapynan birqatar máseleler men usynystar aıtyldy. Atap aıtqanda, jaldamaly páterlerdi alý konkýrsyna qatysý úshin turǵyn úıge muqtaj jas mamandar úshin jalaqy mólsheri tym joǵary ekendigi aıtyldy. Jalǵa beriletin turǵyn úıdi konkýrs boıynsha alý qıyn. Jumysshy jastardyń aıtýynsha, páter alý úshin aılyq kórsetkishti (40-tan 25 AEK-ke deıin ) tómendetý –megapolısterdegi eńbegi óte qajet jas otbasylar men jas mamandarǵa úlken kómek. Joǵaryda aıtylǵandardyń negizinde jastardy qoldaý maqsatynda jalǵa beriletin baspanaǵa arnalǵan konkýrstarǵa qatysýshylarǵa qoıylatyn talaptardy ózgertý múmkindigin qaraýdy suraımyn.
Bul baǵdarlamanyń maqsaty megapolısterdegi suranysqa ıe mamandyqtardyń jas mamandarymen qamtamasyz etý ekenin eske salǵym keledi. Osyǵan baılanysty jas mamandardyń tabystaryna qoıylatyn talaptardyń joǵarylyǵy túrindegi tosqaýyldardy belgileý orynsyz dep sanaımyz jáne jastardy jalǵa beriletin turǵyn úı konkýrsyna qatysýǵa jol beretin somalardyń, tabystardyń eseligin azaıtýdy usynamyz», - deıdi Ǵanı Tashqaraev.
