Depýtat jastardyń jumyssyz júrýiniń sebepterin atady
ASTANA. QazAqparat - Jastar arasynda jumyssyzdyqtyń artýyna mamandardy daıarlaý úrdisiniń eńbek naryǵyna sáıkes kelmeýi yqpal etedi. Bul týraly Astanada Májilis depýtaty Aıgúl Nurkına málim etti, dep habarlaıdy QazAqparat.
«Eńbek resýrstarynyń óńirlik teńgerim tıimdiliginiń tómendigine baılanysty kóbinese eńbek naryǵynda suranysqa ıe emes mamandyqtar boıynsha kadrlardy daıarlap kelemiz. QR UEM Statıstıka komıteti málimetinshe, sońǵy jyldary jumyssyzdyq deńgeıi tómendedi, ıaǵnı 2013 jyldaǵy 5,2 paıyzdan 2017 jyly 4,9 paıyzǵa deıin azaıdy. Al 15-ten 28 jasqa deıingi jastar arasyndaǵy jumyssyzdyq 5,5 paıyzdan 4,1 paıyzǵa deıin tómendedi. Sonymen birge, elimiz boıynsha jumyssyzdyq deńgeıi tómendeýiniń jalpy úrdisine qaramastan, bólek óńirlerde basqa jaǵdaı oryn alýda», - dedi depýtat «Nur Otan» partııasy Ortalyq apparaty ǵımaratynda tehnıkalyq jáne kásibı bilim berý taqyrybymen ótken otyrysta.
Onyń sózine qaraǵanda, Ońtústik Qazaqstan oblysy men Almaty qalasynda jumyssyzdyq deńgeıi respýblıkalyq kórsetkishten joǵary, sáıkesinshe 5,2 paıyzdy jáne 5,3 paıyzdy qurap otyr.
15-ten 28 jasqa deıingi jastar jumyssyzdyǵy jalpy respýblıkalyq deńgeıden 1 paıyzǵa joǵary kórsetkish Qaraǵandy oblysynda, 2,8 paıyzǵa Almaty qalasynda baıqaldy.
«Ońtústik Qazaqstan oblysynda jastar jumyssyzdyǵy 2016 jyldyń qorytyndysy boıynsha 3,9 paıyzdan 2017 jylǵy ekinshi toqsandaǵy málimet turǵysynda 5,5 paıyzǵa deıin ósti»,- dep naqtylady A. Nurkına.
Belgili bolǵandaı, jastar jumyssyzdyǵy deńgeıi boıynsha eń az kórsetkish Aqmola, Aqtóbe, Atyraý, Almaty, Soltústik Qazaqstan, Shyǵys Qazaqstan oblystarynda tirkeldi. Jumyssyzdyq deńgeıi turǵysynda osyndaı shashyrańqylyq sebepteriniń biri eńbek resýrstarynyń aýmaqtyq teńgerimsizdigine qatysty bolyp otyr.
A. Nurkınanyń atap ótýinshe, tek Almatyda ǵana 38 JOO men 82 kolledj bar. jumysqa turýǵa daıar 40 myńnan astam maman shyǵady.
«Statıstıka derekterine súıensek, 2018 jyly maman retinde naryqqa shyǵatyndar 43 myńǵa jýyqtaıdy, onyń ishinde 27 myńy joǵary oqý oryndarynyń túlekteri. Olardyń arasynda kóbisi basqa óńirlerden kelgen jastar jáne 50 paıyzdan astamy Almaty qalasynda qalýǵa nıetti. Alaıda túlekterdiń kásibı tańdaýynyń negizgi bóligi ekononomıkalyq, qarjylyq, zańgerlik mamandyqtarǵa tıesili. Degenmen de qala ekonomıkasynda tehnıkalyq ári marketıng salasyndaǵy mamandarǵa erekshe suranys bar. Eńbek naryǵynda ekononomıkalyq, qarjylyq, zańgerlik kadrlardyń tym kóp kezedsýine baılanysty qaladaǵy joǵary oqý oryndary túlekteriniń 30 paıyzǵa jýyǵy taıaýda tıisti qıyndyqtarǵa tap bolýy múmkin»,- dep túsindirdi depýtat.
Onyń aıtýynsha, 2017-2021 jyldary aralyǵynda Pavlodar oblysynda tehnıkalyq jáne kásibı bilimi bar kadrlarǵa qajettilik 229 mamandyq boıynsha 21 myń 800 adamnan asyp túsedi. Joǵary bilimdi mamandardyń jetispeýshiligi 163 mamandyq turǵysynda 2 myń 700-den astam adamdy quraıdy.
