Depýtat jasandy ıntellekt týraly: Rýhanı jaǵynan qaýip-qater bar
ASTANA. KAZINFORM – Búgin Májilistiń jalpy otyrysynda depýtat Anas Baqqojaev jasandy ıntellektini mektepte jáne joǵary bilim salasynda paıdalaný kezinde baqylaýdy kúsheıtýdi surady.
- Men jasandy ıntellektige qarsy emespin. Degenmen, buǵan deıin adamzatqa rýhanı jaǵynan kelýi múmkin qaýip-qater týraly aıtqan edim. Mysaly, muǵalim úı tapsyrmasyn jasaý úshin jasandy ıntellektini padalanyp, suraqtaryn daıyndap qoıdy delik. Úıine kelgen oqýshylar da ol tapsyrmaǵa jasandy ıntellekti arqyly jaýabyn shyǵaryp alady. Magıstratýraǵa túsken jastar da dál solaı áreket etedi. Sonda biz kim boldyq?! Qazir balalar men jastardyń sózdik qory nasharlaǵan. Rýhanı jaǵyn, bilim men ǵylymdy qalaı qorǵaımyz? Atalǵan zań jobasynda ondaı normalardy kórmedim. Mektepter men joǵary bilim salasynda osy baǵyttaǵy baqylaýdy nege kúsheıtpeımiz?! Jasandy ıntellektini qosymsha qural retinde qoldanýǵa bolady, biraq ony paıdalaný mádenıetin qalyptastyrý kerek, - dedi A. Baqqaojaev Parlament Májilisinde jasandy ıntellekt týraly zań jobasyn talqylaý kezinde.
Aıta keteıik, búgin Májiliste Jasandy ıntellekt týraly zań birinshi oqylymda talqylanyp jatyr.
Eske salsaq, jaqynda Májilis depýtaty Dáýlet Muqaev mektep oqýshylaryna jasandy ıntellektini paıdalanýǵa shekteý engizýdi usyndy.