Depýtat: jańa Konstıtýtsııa jobasynyń ózegi – adam jáne adam quqyqtary
ASTANA. KAZINFORM – Jańa Ata zań jobasy adam quqyqtary joǵary deńgeıde qorǵalýyna kepildik beredi. Bul jóninde QR Parlamenti Májilisiniń depýtaty Abzal Quspan «Konstıtýtsııalyq reforma jáne qoǵamdyq dıalog: keleshekke baǵdar» atty sarapshylar alańynda málimdedi.
Sonyń bir mysaly retinde ol advokatýra mártebesiniń bekitilýine toqtaldy.
– Depýtat bolmaı turyp advokatýra salasynda qyzmet ettim. Advokattar arasynda sońǵy 20 jyl boıy bul másele aıtylyp kele jatyr. Prokýratýra men advokatýra, ıaǵnı aıyptaý taraby men qorǵaý taraby protsestik turǵyda teń bolýy tıis. Endi jańa Konstıtýtsııa jobasyna saı, advokatýra alǵash ret ınstıtýt retinde engizilip otyr, – dedi ol.
Onyń sózinshe, 1995 jyly qabyldanǵan, qazirgi qoldanystaǵy Ata zańda prokýratýranyń barlyq ókilettigi kórsetilgen.
– Osy ýaqytqa deıin qylmystyq jáne basqa da isterde advokatýra prokýratýramen teń dárejede bola alǵan joq. Álemde kóptegen damyǵan elde aldymen advokatýra men prokýratýra konstıtýtsııalyq deńgeıde teńestirilip, odan keıin protsestik normalar ózara teńesken bolatyn. Jańa Konstıtýtsııa jobasyndaǵy negizgi jańalyqtardyń biri – adam quqyqtary joǵary deńgeıde qorǵalýyna kepildik beretin ınstıtýt retinde advokatýranyń konstıtýtsııalyq mártebesi bekitildi, – dedi depýtat.
Aıta keteıik, buǵan deıin Qazaqstandaǵy konstıtýtsııalyq reforma eldiń halyqaralyq bedeline de yqpal etetinin jazǵanbyz.
