Depýtat: Jańa Konstıtýtsııa jobasyndaǵy ár norma táýelsizdikti qorǵaýǵa baǵyttalǵan

ASTANA. KAZINFORM — Jańa Ata zań jobasy tutastaı eldiń egemendigine kepildik beredi. Bul týraly QR Parlamenti Májilisiniń depýtaty Janarbek Áshimjan «Referendým-2026» onlaın marafony barysynda málimdedi.

Onyń sózinshe, jańa Konstıtýtsııaǵa kóshý jańa bir tarıhı kezeńge ótýge jol ashady.

— Táýelsizdiktiń tamyryna balta shabýǵa jasalǵan qadamnyń barlyǵy zańnamalyq turǵydan talqandalý kerek. Jańa Konstıtýtsııa jobasynyń 1-babynan bastap, búkil 11 bólim, 96 babynyń barlyǵy táýelsizdikti qorǵaýǵa baǵyttalǵan. Ádebı, mádenı, rýhanı, ǵylymı turǵydan bastap, ekonomıkalyq táýelsizdik, saıası táýelsizdik, azamattardyń ar-ojdan bostandyǵy, terrıtorııalyq táýelsizdik, ózge eldermen qarym-qatynas — osynyń barlyǵy jańa Konstıtýtsııa jobasynda qamtylǵan. Bul — jańa bir tarıhı kezeńniń bastaýy, — dedi depýtat.

Eske salaıyq, buǵan deıin jańa Konstıtýtsııa jobasy qazaq tilinde jatyq jazylǵany jóninde habarlaǵan edik.