Depýtat: Jańa Konstıtýtsııa jobasy memleket pen azamattar arasyndaǵy senimdi nyǵaıtady

ASTANA. KAZINFORM — Jańa Konstıtýtsııa jobasyna engen sot sheshiminsiz turǵyn úıden aıyrmaý týraly norma azamattar quqyǵyn qorǵaıdy. Bul týraly QR Parlamenti Májilisiniń depýtaty Marhabat Jaıymbetov «Referendým-2026» onlaın marafony barysynda málimdedi.

— Turǵyn úı — ár adamnyń qasıetti mekeni. Eshkimniń qaýipsiz ómir súrý quqyǵyna qol suǵýǵa jol joq. Al turǵyn úıden sot sheshiminsiz shyǵarmaý máselesi konstıtýtsııalyq deńgeıde kóterilgeni — azamattar men memleket arasyndaǵy senimdi nyǵaıtady. Ásirese, bul qarttarǵa, múgedekterge, az qamtylǵan otbasylarǵa ómirlik kepildik bolady, — dedi depýtat.

Sondaı-aq, ol naqty mysaldar keltirdi. Máselen, eski úılerdi súrý úshin jergilikti atqarýshy organdar olardyń ıelerine ótemaqy usynady. Biraq oǵan kelispeı, úıin súrgizgisi kelmeıtin azamattar bolýy múmkin. Mundaı jaǵdaıda jańa Konstıtýtsııa jobasyna saı, azamattyń, ıaǵnı, úı ıesiniń quqyǵy eskeriledi.

— Ekinshi mysal, memlekettik muqtajdyq úshin. Bas jospar ózgeredi, ne bolmasa, jol salý kerek bolady. Mysaly, Astanada saıajaılar súrilip jatyr. Ol jerde máseleler bar. Keı qurylysshylar ruqsat almaı, sottyń sheshimin almaı, úılerdi qorshap tastap, eshkimdi shyǵarmaı, jumysqa kirisip ketedi. Jańa Konstıtýtsııa jobasy mundaı kezde de azamattardyń quqyǵyn qorǵaıdy, — dep túsindirdi M. Jaıymbetov.

Aıta keteıik, buǵan deıin Qazaqstannyń jańa Konstıtýtsııa jobasy álemdik BAQ-ta tarıhı sheshim retinde baǵalanyp otyrǵanyn habarlaǵanyn edik.