Depýtat: Jańa Konstıtýtsııa el damýynyń jańa kezeńin bastaıdy

ASTANA. KAZINFORM — Qoǵam respýblıkalyq referendýmǵa belsendi qatysyp, halyqtyń 86,7 paıyzy jańa Konstıtýtsııany qoldady. Parlament Májilisiniń depýtaty Natalıa Dementeva Jibek Joly telearnasynyń «Búgin Live» baǵdarlamasynda tarıhı sheshimniń mańyzyna toqtaldy.

— Jańa Konstıtýtsııadaǵy mańyzdy jańalyqtardyń biri — vıtse-prezıdent laýazymynyń engizilýi. Mundaı ınstıtýt birqatar shet memlekette bar. Vıtse-prezıdent saıası sabaqtastyqty saqtap, memlekettik basqarýda turaqtylyq pen teńgerimdi qamtamasyz etýge kómektesedi. Jalpy, jańa Konstıtýtsııanyń basty qaǵıdaty — adam quqyqtaryn qorǵaý. Sonyń aıqyn mysaldarynyń biri — Mıranda qaǵıdasynyń engizilýi, — dedi Natalıa Dementeva.

Sonymen qatar, depýtat otbasy ınstıtýtyna arnalǵan jeke baptyń engizilýin mańyzdy sheshim dep baǵalady. Onyń pikirinshe, bul norma qoǵamdaǵy jaýapkershilik pen dástúrli qundylyqtardy nyǵaıtýǵa yqpal etedi.

— Jańartylǵan Konstıtýtsııada otbasy ınstıtýtyn qoldaýǵa erekshe mán berilgen. Negizgi zańda otbasy qoǵamnyń mańyzdy tiregi retinde qarastyrylyp, ony qorǵaý men nyǵaıtýǵa baǵyttalǵan qaǵıdattar bekitilgen. Bul dástúrli otbasylyq qundylyqtardy ilgeriletýge, óskeleń urpaqty sol qundylyqtardy qurmetteý rýhynda tárbıeleýge múmkindik beredi. Buǵan deıin Májiliste LGBT propagandasyna qatysty másele qaralyp, oǵan tyıym salý týraly sheshim qabyldanǵan bolatyn. Bul bastamany Prezıdent Qasym-Jomart Toqaev ta qoldady, — dedi Natalıa Dementeva.

Depýtattyń aıtýynsha, jańa Konstıtýtsııa saıası nemese áleýmettik máselelermen ǵana shektelmeı, eldiń bolashaq damýyna áser etetin bilim, ǵylym jáne ınnovatsııa salalaryna da erekshe nazar aýdarady.

— Búginde jastardyń ómirin jasandy ıntellektsiz elestetý qıyn. Degenmen onyń keri áseri de bolýy múmkin ekenin umytpaý kerek. Muny ata-analar da túsindirýi qajet. Jasandy ıntellekt bilimniń ornyn basatyn qural emes, tek kómekshi tetik retinde paıdalanylýy tıis. Bilim árdaıym birinshi orynda turýy kerek. Bul qaǵıda jańa Konstıtýtsııamyzda aıqyn kórinis tapqan, — dedi spıker.

Aıta keteıik, búgin Prezıdent Qasym-Jomart Toqaev respýblıkalyq referendým barysynda júrgizilgen ekzıt-poll qorytyndysymen tanysty.