Depýtat Jambyl oblysyndaǵy ekologııalyq ahýalǵa alańdaýly
NUR-SULTAN. QazAqparat – Senattyń jalpy otyrysynda depýtat Bekbolat Orynbekov Úkimetke joldaǵan saýalynda Jambyl oblysyndaǵy birqatar problemalardy tizip shyqty, dep habarlaıdy QazAqparat tilshisi.
Depýtattyń aıtýynsha, memlekettik kepildikpen halyqaralyq qarjy uıymdarynan qarajatyn tartý arqyly birneshe qalada kárizdik tazartý ımarattaryn salý jáne rekonstrýktsııalaý jobasy josparlanǵan. Alaıda, tehnıkalyq-ekonomıkalyq negizdemesi ázirlengen birinshi rettik qalalar tizimine 400 myńǵa jýyq turǵyny bar Jambyl oblysynyń ortalyǵy Taraz qalasy kirmeı qalǵan.
Qalalyq káriz jelisine sonymen birge sarqyndy sýlardy aǵyzatyn turǵyn úı qurylystary men ónerkásip kásiporyndarynyń qaldyqtary qosylady. Al bul súzý alańdaryna shamadan tys qysym týǵyzyp, gıdravlıkalyq aýyrtpalyqqa ákelip soǵady. Osynyń saldarynan jer asty sýlary lastanyp barady. Bul Jambyl aýdanynyń jaqyn mańdaǵy Birlesý-Eńbek, Qostobe, Órnek, Ernazar, Tastóbe atty bes eldi mekeniniń turǵyndaryn aýyz sýdan aıyryp, aýyl sharýashylyǵy alqaptaryn batpaqqa aınaldyrdy, al eldi mekenderdi sý basatyn boldy.
«Osynyń bárin eskere kelip, atalǵan máseleniń Jambyl oblysy turǵyndarynyń turmys-tirshiligine jáne ekologııalyq turǵydan mańyzdylyǵyn eskere otyryp, ony tezdetip sheshý úshin Taraz qalasyn káriz-tazartý ǵımaratyn salý josparynyń 1 kezeńine qosýǵa qoldaý kórsetýińizdi suraımyz», - dedi Bekbolat Orynbekov.
