Depýtat Jambyl dıqandarynyń nesıe men lızıng tólemderin bir jylǵa ósimpulsyz shegerýdi usyndy
ASTANA. KAZINFORM — Májilis depýtaty Erbolat Saýryqov Jambyl oblysy dıqandarynyń nesıe men lızıng tólemderin bir jylǵa ósimpulsyz shegerýdi usyndy.
— Sońǵy úsh jylda Jambyl oblysy men oǵan irgeles óńirlerdiń sharýalary buryn-sońdy bolmaǵan aýyr synaqqa tap bolyp otyrǵandaryn jetkizdi. 2023 jyly qýańshylyq jarııalanyp, tótenshe jaǵdaı engizilgenimen, ótemaqy tek sýarmaly jerleri bar sharýashylyqtarǵa ǵana berildi. Al sýarylmaıtyn jermen aınalysatyn fermerler eshqandaı kómek ala almady.
2024 jyly ónim mol jınalǵanymen, Reseıden arzan astyqtyń aǵylyp kelýi saldarynan baǵa kúrt quldyrady. Otandyq dıqandar óz ónimin ótkize almady. Shyǵyn jabylmady, tabys túspedi. Buǵan qosa, sýbsıdııa tólemderi keshiktirilip, sharýalardyń jaǵdaıy odan ári aýyrlady.
2025 jyly qaıtadan qýańshylyq qaıtalandy. Túrkistan oblysynda tabıǵı sıpattaǵy tótenshe jaǵdaı jarııalanǵanymen, Jambyl oblysynda mundaı qadam jasalmady. Sonyń saldarynan sýbsıdııa da, ınvestıtsııalyq qoldaý da berilmedi. Myńdaǵan sharýashylyq qazir bankrot bolýdyń aldynda tur, — dedi ol Premer-mınıstr Oljas Bektenovke saýal joldaı otyryp.
Onyń sózinshe, Agrarlyq nesıe korporatsııasy tólemdi keıinge shegerý týraly ótinishterdi elemeı otyr.
— Bul — ádiletsiz jaǵdaı dep esepteımiz! «QazAgroQarjy» deregine súıensek, bıyl shilde aıynyń ózinde Jambyl oblysynda 62 jobanyń problemalyq bolyp tirkelgen. Qazir kúzde bul kórsetkish eki esege artýy múmkin. Demek, júzdegen sharýashylyqtyń tehnıkasy tárkilenip, jappaı bankrottyqqa jol beriledi, — deıdi depýtat.
Májilis depýtaty osyndaı olqylyqqa jol bermeý úshin óńir dıqandarynyń nesıe jáne lızıng tólemderin bir jylǵa eshqandaı ósimpulsyz shegerý kerektigin aıtady.
— Ekinshiden, 2024–2025 jyldarǵa arnalǵan sýbsıdııalar men ınvestıtsııalyq sýbsıdııalar boıynsha bereshekterdi tolyq óteýdi qamtamasyz etip, tólem kestesin naqty bekitý kerek.
Úshinshiden, sýbsıdııalaý júıesin qaıta qarap, túsiniksiz, qaıshylyqty normalardy joıyp, tek naqty baǵyttalǵan, ádil qoldaý mehanızmin engizý qajet.
Tórtinshiden, qaryzyn ýaqytyly óteı almaǵany úshin sharýalardy sýbsıdııadan aıyrý tájirıbesin toqtatyp, qaıta sýbsıdııa alý múmkindigin berý kerek. Óıtkeni egin shyqpaǵan jaǵdaıda fermerdi jazalaý — ádiletke jatpaıdy.
Besinshiden, «QazAgroQarjy» men Agrarlyq nesıe korporatsııasyn tarta otyryp, fermerlerdiń jappaı bankrot bolýyna jol bermeıtin daǵdarysqa qarsy sharalar paketi ázirlenýi tıis.
Altynshydan, elimizdiń ońtústik óńirlerine arnalǵan jeke memlekettik baǵdarlama qajet. Óıtkeni bul óńirdiń klımaty, topyraǵy, egis ereksheligi basqa aımaqtardan aıtarlyqtaı ózgeshe. Sýbsıdııa men saqtandyrý júıesi osyǵan saı qurylýy shart.
Jetinshiden, kúzgi dala jumystaryna, tuqym men janar-jaǵarmaıǵa arnalǵan óńirlik turaqtandyrý qory jasaqtalýy kerek, — dedi Erbolat Saýryqov.
Buǵan deıin jambyldyq qyzylsha ósirýshilerge 3 mlrd teńge qaryz qaıtarylatynyn jazǵan edik.