Depýtat Jamalov bıtkoındy «spekýlıatsııanyń quraly» dep atady
ASTANA. QazAqparat - QR Parlament Májilisiniń búgingi plenarlyq otyrysynda depýtat Amanjan Jamalov QR Ulttyq tóraǵasy Danııar Aqyshevtiń atyna saýal joldady, dep xabarlaıdy QazAqparat tilshisi.
«Qazaqstanda krıptovalıýtalar bırjasy qurylyp jatyr. Bıtkoındardy satatyn avtomattar da ornatyla bastady. Alaıda atalǵan qyzmet eshqandaı zańmen rettelmeıdi. Elimizde krıptovalıýtalardyń tranzaktsııalaryn retteıtin zańnama joq», - deıdi Jamalov.
Onyń aıtýynsha, búginde Japonııa krıptovalıýtany resmı tólem quraly retinde tanydy. Ońtústik Koreıa bıtkoınmen xalyqaralyq aýdarymdardy zańmen bekitip, atalǵan krıptovalıýtamen saýdalaıtyn bırjany ashýdy kózdeıdi. Reseı bolsa, kelesi jylda bıtkoın saýdasyn zańdastyrýdy josparlap otyr.
«Degenmen, xalyq pen bıznes bıtkoındar saýdasymen aınalyssa, úlken táýkelder bolady. Sebebi krıptovalıýtanyń ózi eshqandaı materıaldyq qundylyqqa negizdelmegen. Ony biryńǵaı baqylaý tetigi de joq. Máselen, aǵymdaǵy jyldyń basynda bıtkoınnyń kýrsy 1 myń dollar bolǵan. Qazir onyń quny 5 myńǵa jaqyndap qaldy. Maýsymnyń basynda 400 dollarǵa tómendegen. Kelesi kúni 120 dollarǵa ósti. Demek, bıtkoınnyń kýrsy turaqsyz, onyń quny spekýlıatıvti rejımde jasalady. Erteń onymen xalyq aınalyssa, úlken shyǵyndarǵa tap bolady. Al ondaı táýkelderden qorǵaıtyn zań joq», - dep atap kórsetti depýtat Jamalov.
Osyǵan baılanysty ol blokcheın men krıptovalıýtalar máselesin úılestiretin memlekettik organdy anyqtaýdy, sondaı-aq osy máseleni talqylaýǵa arnalǵan vedomstvoaralyq komıssııany qurýdy usyndy.
Aıta keteıik, otyrystyń basynda depýtattar Qazaqstannyń Azııa ınfraqurylymdyq ınvestıtsııalar bankine múshe bolýyna baılanysty birqatar zańdarǵa ózgeris engizýdi pysyqtap shyqty. Sondaı-aq, qarý saýdasy týraly shartty ratıfıkatsııalaý máselesin qarady.
