Depýtat J. Súleımenov jınalystardy memlekettik tilde ótkizýge, resmı kezdesýlerde qazaqsha sóıleýge shaqyrdy

Bul týraly ol búgin Parlament Májilisiniń jalpy otyrysynda Premer-Mınıstr Kárim Másimovke joldaǵan saýalynda málim etti.

«Elimizde memlekettik tilimizdiń asa zor qoǵamdyq jáne saıası mańyzǵa ıe bolyp otyrǵandyǵyn eshkim joqqa shyǵara almaıdy. Sol sııaqty Qazaqstan Respýblıkasynda qandaı salada bolmasyn memlekettik tildi erkin qoldanýǵa, azamattar da, qoǵam da daıyn desek, artyq aıtqandyq emes. Sodan ba eken, meniń kóńilimde kúdikten góri úmit basym», - deıdi depýtat.

Onyń aıtýynsha, týǵan tilimizdiń aıaǵyn tusap, baǵyn baılap turǵan kúrmeýi qıyn máseleler áne-mine sheshiletin, sóıtip qazaq tili óz tuǵyryna qonatyn, memlekettik til retindegi rólin tolyqqandy atqara bastaıtyn sııaqty kórinedi de turady. «Osylaı úmitimdi úkileı otyryp, Parlament depýtattary men bılik basynda otyrǵan barlyq azamattarǵa, barlyq jınalystardy memlekettik tilde ótkizýge, resmı kezdesýlerde qazaqsha sóıleýge, sóıtip memlekettik tildi qurmetteýge, qoldaýǵa shaqyryp otyrmyn. Osyndaı qadamǵa Parlament basshylyǵy men depýtattar da barsa, qazaq tilinde sóıleýdi buljymas zańǵa aınaldyrsa, nur ústine nur bolar. Sonda týǵan tilimizdiń kósegesi birden kógermese de, bir kem dúnıeniń orny tolar edi dep oılaımyn», - dedi halyq qalaýlysy.

Onyń aıtýynsha, budan bylaı «barshaǵa túsinikti bolsyn» degen syltaýmen bógde tilde shúldirleı jónelýden arylý kerek. «Ásirese, meniń bul sózderime anasynyń áldıi qulaǵynda qalmaǵandar, besiginde ana tiliniń ýyzyna qanbaǵandar qulaq asyp, qıqarlanbaı túzý jolǵa tússe deımin. Ardaqty aǵaıyn, halqymyzdyń sarqylmas qazynasy, eń úlken ıgiligi - tarıhtyń ózindeı, babalardyń kózindeı el bastaǵan kósemderdiń tili, sóz bastaǵan sheshenderdiń tili - qazaq tilin qurmetteıik, qazaq bolaıyq, úıde de, túzde de qazaqsha sóıleıik. Balalarymyz ben nemerelerimizdi osyǵan tárbıeleıik», - dedi depýtat.